అందుకే వెర్రి!: ధనుష్ కొలవెరిపై రాఘవులు కామెంట్

By Srinivas

Published: Friday, January 13, 2012, 9:04 [IST]

హైదరాబాద్: సూపర్ స్టార్ రజనీకాంత్ అల్లుడు ధనుష్ కొలవెరి డి పాటపై సిపిఎం రాష్ట్ర కార్యదర్శి నారాయణ గురువారం ఆశ్చర్యకరమైన వ్యాఖ్యలు చేశారు. కొలవెరి పాట ఇంటర్నెట్‌లో హల్ చల్ చేస్తున్న విషయం తెలిసిందే. ఖమ్మంలో ఫిబ్రవరి మొదటి వారం తలపెట్టిన రాష్ట్ర మహాసభల నేపథ్యంలో సుందరయ్య విజ్ఞాన కేంద్రంలో జరిగిన కార్యక్రమంలో ఆయన పాల్గొన్నారు. ఈ సందర్భంగా ఆయన మాట్లాడుతూ కళా సాంస్కృతిక రంగాన్ని విస్మరించామని అందుకే కొలవెరి వెర్రిలో జనం ఊగిపోతున్నారన్నారు. పండుగలను మతభావాలకు, జానపద కళల్ని కొలవెరి వంటి పాశ్చాత్య పోకడలకు వదిలేశామని కార్యక్రమంలో ఆవేదన వ్యక్తం చేశారు. శక్తివంతమైన కళా సాంస్కృతిక రంగాన్ని వదిలేయడం సరికాదన్నారు.

ప్రతి అడుగులోనూ ఎరుపుండాలని, కానీ అది కల్తీ కావొద్దని ఆయన అన్నారు. అభ్యుదయ భావనలు ఏ రంగంలో ఉన్నా స్వీకరిస్తామని చెప్పారు. ప్రజలను మలిచే విధానంలో సాంస్కృతిక రంగానిదే కీలకపాత్ర అన్నారు. సమావేశానికి ముందు ఓ తమిళ కామ్రేడ్ తనకు తారసపడ్డారని, కొలవెరి సరే ఆ డీ ఏమిటని ప్రశ్నిస్తే తనకు కూడా తెలియదన్నారని చెప్పారు. మనదే అభ్యుదయం అనుకుంటే సరిపోదని, హాలీవుడ్ దర్శకుడు హిచ్ కాక్ సినిమాల్లోనూ పెట్టుబడిదారీ విధానానికి వ్యతిరేకంగా వర్గ విశ్లేషణ ఉందన్నారు. సాంస్కృతిక, సాహిత్య, సినిమా కళా రంగాల్లో పెరిగిపోతున్న వ్యాపార సంస్కృతికి ప్రత్యామ్నాయాన్ని తీసుకురానున్నామని ప్రకటించారు. ప్రజల్లో మానవత్వాన్ని, సౌబ్రాతృత్వాన్ని పెంచే సంస్కృతిని పెంచేదిశగా మహాసభ నిర్ణయాలుంటాయని చెప్పారు.

Published On January 13, 2012