సాక్షిగా సిబిఐ ఎదుటకు వైయస్ ఆత్మబంధువు కెవిపి

By Srinivas

Published: Sunday, January 15, 2012, 15:32 [IST]

హైదరాబాద్: దివంగత ముఖ్యమంత్రి వైయస్ రాజశేఖర రెడ్డి ఆత్మబంధువు, కాంగ్రెసు పార్టీ నేత కెవిపి రామచంద్రా రావు సోమవారం సిబిఐ(సెంట్రల్ బ్యూరో ఆఫ్ ఇన్వెస్టిగేషన్) ఎదుట హాజరు కానున్నారు. ఎమ్మార్ కేసులో ఆయన సిబిఐ ఎదుట సాక్షిగా హాజరు కానున్నారని సమాచారం. తన భార్య పేరిట కొన్న విల్లాలకు సంబంధించిన డాక్యుమెంట్లను తీసుకు రావాల్సిందిగా సిబిఐ కెవిపికి నోటీసులు జారీ చేసింది. సోమవారం ఆయన తన భార్య పేరిట కొన్న విల్లాలకు సంబంధించిన పత్రాలతో హాజరు కానున్నారని సమాచారం. ఎమ్మార్‌లో విల్లాలు కొన్న వారిని సిబిఐ విచారిస్తున్న విషయం తెలిసిందే. ఇప్పటికే పలువురు ప్రముఖులను విచారించింది. తాజాగా కెవిపిని రావాల్సిందిగా సూచించింది.

మరోవైపు వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి ఆస్తుల కేసులో అరెస్టైన జగతి పబ్లికేషన్స్ వైస్ చైర్మన్ విజయ సాయి రెడ్డిని సిబిఐ అధికారులు ఉదయం చంచల్ గూడ జైలు నుండి దిల్ కుషా అతిథి గృహానికి తరలించారు. విజయ సాయి కస్టడీ సోమవారంతో ముగుస్తోంది. పదిహేడే తారీఖు ఉదయాన సిబిఐ విజయ సాయి రెడ్డిని కోర్టులో హాజరు పర్చవలసి ఉంటుంది.

Published On January 15, 2012