ఎన్టీఆర్ విగ్రహావిష్కరణకు బ్రేక్: నామా అరెస్టు, బాబు ఫైర్

By Srinivas

Published: Wednesday, January 18, 2012, 16:28 [IST]

ఖమ్మం: జిల్లాలో దివంగత తెలుగుదేశం పార్టీ వ్యవస్థాపకులు నందమూరి తారక రామారావు విగ్రహావిష్కరణను పోలీసులు అడ్డుకోవడం బుధవారం ఉద్రిక్తతకు దారి తీసింది. ఎన్టీఆర్ పదహారో వర్ధంతి సందర్భంగా స్థానిక పార్లమెంటు సభ్యుడు నామా నాగేశ్వర రావు అక్కడ ఏర్పాటు చేసిన ఎన్టీఆర్ విగ్రహాన్ని ఆవిష్కరించేందుకు వెళ్లారు. అయితే విగ్రహానికి అనుమతి లేదని చెబుతూ పోలీసులు నామాను అడ్డుకున్నారు. దీంతో ఇరువర్గాల మధ్య తోపులాట జరిగింది. పరిస్థితి ఉద్రిక్తంగా మారుతుందని భావించిన పోలీసులు నామా నాగేశ్వర రావును అరెస్టు చేశారు. నామా అరెస్టును టిడిపి అధినేత నారా చంద్రబాబు నాయుడు ఖండించారు. ఎన్టీఆర్ విగ్రహాలు ఆవిష్కరించకూడదా అని ఆయన పోలీసులను ప్రశ్నించారు. విగ్రహాల ప్రతిష్టాపనకు ప్రాతిపదిక ఏమిటో చెప్పాలని ఆయన ప్రభుత్వాన్ని ప్రశ్నించారు.

కాగా నామా అరెస్టును నిరసిస్తూ మధిర, ఇల్లందు, కొత్తగూడెం ప్రాంతాల్లో తెలుగుదేశం పార్టీ కార్యకర్తలు ఆందోళనకు దిగారు. నామాను అక్రమంగా అరెస్టు చేశారని, ఆయనను వెంటనే విడుదల చేయాలని డిమాండ్ చేశారు. నామాను ఉంచిన ఖమ్మం పట్టణంలోని త్రీటౌన్ పోలీసు స్టేషన్ ఎదుట టిడిపి ఆందోళనకు దిగింది.

Published On January 18, 2012