ఉప ఎన్నికలకు ముందే బాలయ్య తెలంగాణ పర్యటన?

By Srinivas

Published: Monday, January 23, 2012, 15:21 [IST]

హైదరాబాద్: హీరో నందమూరి బాలకృష్ణ గత పక్షం రోజులుగా సీమాంధ్రలో విస్తృతంగా పర్యటిస్తున్నారు. ఈ నేపథ్యంలో తెలంగాణ ప్రాంతానికి చెందిన తెలుగుదేశం పార్టీ ఎమ్మెల్యే ఎల్ రమణ, బాలకృష్ణ తెలంగాణలో పర్యటించాలని, ఆయన ఎప్పుడైనా రావొచ్చునని చెప్పారు. దీంతో బాలకృష్ణ తెలంగాణ పర్యటనపై చర్చ ప్రారంభమైంది. తెలంగాణ విషయంలో కేంద్రమే నిర్ణయం తీసుకోవాలని, తమకు ఇరు ప్రాంతాలు సమానమేనని తెలుగుదేశం పార్టీ అధినేత నారా చంద్రబాబు నాయుడు ప్రకటించిన విషయం తెలిసిందే. తెలంగాణపై ఎవరైనా తనను ప్రశ్నిస్తే బాలయ్య, పార్టీ అధిష్టానం నిర్ణయమే తన నిర్ణయమని చెప్పేశారు. మరోవైపు తెలంగాణవాదులు టిడిపి స్పష్టమైన నిర్ణయం ప్రకటించాలని డిమాండ్ చేస్తున్నారు. ఈ పరిస్థితుల వల్ల బాలకృష్ణ తెలంగాణ పర్యటన ఉత్కంఠను రేకెత్తిస్తోంది. అయితే ఇటీవల అదిలాబాద్, వరంగల్, కరీంనగర్, నిజామాబాద్ జిల్లాల్లో పర్యటించిన చంద్రబాబుకు అంత వ్యతిరేకత కనిపించలేదు.

దీంతో తెలంగాణ ప్రాంతంలో ఉప ఎన్నికలు ఉన్న నేపథ్యంలోనే టిడిపి తెలంగాణ నేతలు బాలయ్యను రావాల్సిందిగా ఆహ్వానించినట్లు కనిపిస్తోంది. సీమాంధ్రలో బాలయ్యకు ప్రజలు నీరాజనాలు పలుకుతున్నారు. మరికొద్ది రోజుల్లో ఉప ఎన్నికలను ఎదుర్కోబోతున్న నేపథ్యంలో బాలయ్య తెలంగాణలో పర్యటిస్తే పార్టీకి ఎంతో ప్లస్ అవుతుందని వారు భావిస్తున్నట్లుగా కనిపిస్తోంది. ఎలాగూ సీమాంధ్ర, తెలంగాణలోని 24 నియోజకవర్గాల్లో ఒకేసారి ఉప ఎన్నికలకు కాంగ్రెసు సిద్ధంగా లేదు. ప్రస్తుతం తెలంగాణకే పరిమితం. చంద్రబాబుకు అంతగా వ్యతిరేకత కనిపించని దృష్ట్యా బాలయ్య తెలంగాణలో అడుగు పెడితే మంచి ఫలితాలు రాబట్టవచ్చునని భావిస్తున్నట్లుగా కనిపిస్తోంది. అదే జరిగితే మరికొద్ది రోజుల్లో అంటే ఉప ఎన్నికలకు ముందే బాలయ్య తెలంగాణలో కాలుమోపవచ్చు.

Published On January 23, 2012