తప్పేమిటి?: బాలకృష్ణ వ్యాఖ్యలపై చిరంజీవి కామెంట్

By Srinivas

Published: Monday, January 23, 2012, 11:39 [IST]

హైదరాబాద్: హీరో నందమూరి బాలకృష్ణ వ్యాఖ్యలపై తిరుపతి శాసనసభ్యుడు, కాంగ్రెసు నేత చిరంజీవి స్పందించారు. పార్టీ ఆదేశిస్తే చిరంజీవిపై పోటీకు కూడా తాను సిద్ధమని బాలకృష్ణ చెప్పారని విలేకరులు అడగ్గా అందుకు చిరంజీవి స్పందించారు. ఇది ప్రజాస్వామ్య దేశమని, ప్రజాస్వామ్యంలో ఎవరు ఎక్కడి నుండైనా పోటీ చేయవచ్చునని చెప్పారు. బాలకృష్ణ వ్యాఖ్యల్లో తప్పేంటన్నారు. కాగా ఆదివారం విశాఖపట్నం జిల్లాలో పర్యటించిన బాలకృష్ణ పార్టీ ఆదేశిస్తే ఏ ప్రాంతంలోనైనా పోటీ చేసేందుకు సిద్ధమని చెప్పారు. అలాగే చిరంజీవిపై పోటీ చేయడానికి కూడా తాను సిద్ధమని పరోక్షంగా సవాల్ విసిరారు. విశాఖపట్నం జిల్లాలోని పాడేరులో ఆయన ఆదివారం పర్యటించారు. పాడేరులో దివంగత నందమూరి తారక రామారావు విగ్రహం ఆవిష్కరించారు. అనంతరం ఆయన చిరంజీవిపై పోటీ విషయం వ్యాఖ్యలు చేసారు.

కాగా ఇటీవల చిరంజీవి, బాలకృష్ణ మధ్య పరోక్షంగా వాదోపవాదాలు జరుగుతున్నాయి. కృష్ణా జిల్లాలో పర్యటించిన బాలకృష్ణ మాట్లాడుతూ సామాజిక న్యాయం పేరుతో వచ్చిన వారు ఏమీ చేయలేకనే తమ పార్టీని కాంగ్రెసులో విలీనం చేశారని విమర్శించారు. ఆ తర్వాత చిరంజీవి స్పందిస్తూ, బాలకృష్ణది చిన్నపిల్లాడి మనస్తత్వమని, వాటిని పట్టించుకోవాల్సిన అవసరం లేదన్నారు. అందుకు బాలయ్య కూడా అంతే ధీటుగా స్పందించారు. పదవుల కోసం ఢిల్లీలో బేరసారాలు చేస్తున్న చిరంజీవి గురించి నేనేమీ మాట్లాడనని, ఆయన మాటలు నేర్చారన్నారు. తాజాగా తాను చిరుపై పోటీకి సిద్ధమని చెప్పడం, అందుకు చిరంజీవి ప్రజాస్వామ్యంలో ఎవరు ఎక్కడి నుండైనా పోటీ చేయవచ్చని సమాధానం చెప్పడం విశేషం.

Published On January 23, 2012