బాబు అనుమతి కావాలా?: వైయస్ వివేకా కౌంటర్

By Srinivas

Published: Monday, January 23, 2012, 12:13 [IST]

కడప: తెలుగుదేశం పార్టీ అధినేత నారా చంద్రబాబు నాయుడుపై దివంగత ముఖ్యమంత్రి వైయస్ రాజశేఖర రెడ్డి సోదరుడు, మాజీ మంత్రి వైయస్ వివేకానంద రెడ్డి సోమవారం విరుచుకు పడ్డారు. వైయస్ విగ్రహాలు పెట్టడానికి చంద్రబాబు అనుమతి తీసుకోవాలా అని ప్రశ్నించారు. ప్రజలు వైయస్‌పై అభిమానంతో విగ్రహాలను ఏర్పాటు చేసుకుంటున్నారని, అలాంటి విగ్రహాలకు చంద్రబాబు అనుమతే కాదు ఎవరి అనుమతి అవసరం లేదన్నారు. స్వర్గీయ ఎన్టీఆర్ విగ్రహాలను తీసివేయమని ఎవరైనా అడిగారా అని ప్రశ్నించారు. చనిపోయిన వారి గురించి అలా దురుసుగా మాట్లాడటమేమిటని, ఆయనది నోరా కాదా అన్నారు. పులివెందుల నియోజకవర్గానికి నీటి కేటాయింపులపై కూడా ఆయన ప్రభుత్వంపై ఆగ్రహం వ్యక్తం చేశారు. పులివెందులకు రావాల్సిన నీటి కేటాయింపుపై ప్రభుత్వం చర్యలు తీసుకోవడం లేదని ఆరోపించారు. నీటిని ఏమాత్రం కేటాయించకుండా ఇప్పుడు నీరు లేదని చెప్పడం దారుణమన్నారు. ఈ విషయమై అధికారుల నుండి ముఖ్యమంత్రి వరకు తీసుకు వెళ్లినా ఫలితం లేదని, ఇందుకోసం పోరాటం చేస్తామన్నారు.

కాగా ఇటీవల ఖమ్మం జిల్లాలో స్థానిక ఎంపీ నామా నాగేశ్వర రావు స్వర్గీయ ఎన్టీఆర్ విగ్రహాన్ని ఆవిష్కరించేందుకు వెళ్లిన సమయంలో పోలీసులు అనుమతి లేదంటూ అడ్డుకున్న విషయం తెలిసిందే. నామాను అడ్డుకోవడంపై చంద్రబాబు మండిపడ్డారు. రాష్ట్రంలో అనుమతులు లేకుండా లక్షలాది విగ్రహాలు పెడుతున్నా ప్రభుత్వం మాట్లాడడం లేదని తాము అధికారంలోకి వస్తే అనుమతులు లేని విగ్రహాలు కూల్చుతామని పరోక్షంగా వైయస్ విగ్రహాలను అన్నారు.

Published On January 23, 2012