సిబిఐ అదుపులో కోనేరు కొడుకు, అరెస్టుకు అవకాశం

By Srinivas

Published: Friday, January 27, 2012, 17:19 [IST]

హైదరాబాద్: ఎమ్మార్ అక్రమాల కేసులో కోనేరు ప్రసాద్ తనయుడు కోనేరు మధు శుక్రవారం సిబిఐ ఎదుట హాజరయ్యారు. దుబాయ్‌లో ఉంటున్న కోనేరు మధును సిబిఐ అధికారులు దుబాయ్ నుండి రప్పించి విచారిస్తున్నారు. ఆయనను అరెస్టు చేసే అవకాశాలు కూడా ఉన్నాయంటూ ఊహాగానాలు వినిపిస్తున్నాయి. కోనేరు ప్రసాద్‌కు ఇద్దరు కొడుకులు. మధు దుబాయ్‌లో ఉంటున్నారు. దీంతో సిబిఐ ప్రధానంగా ఈయన పైనే దృష్టి సారించింది. ఎమ్మార్ కేసులో దుబాయ్‌లో ఉంటున్న మధు అకౌంట్ ద్వారా విదేశాల్లోకి నిధులు మళ్లించారని సిబిఐ అనుమానిస్తోంది. మధ్యాహ్నం రెండు గంటలకు ఆయనను అధికారులు దిల్ కుషా గెస్టు హౌస్ వద్దకు తీసుకు వచ్చి విచారిస్తోంది. ప్రభుత్వ వాటా ఎంతకు తగ్గించారు, ఇందులో ఎవరెవరి హస్తముంది తదితర అంశాలపై ఆయనను ప్రశ్నిస్తున్నట్లుగాసమాచారం.

ఇటీవల సునీల్ రెడ్డి అరెస్టు సైలెంట్‌గా జరిగింది. ఆయనను రెండు రోజుల పాటు విచారించిన సిబిఐ ఆ తర్వాత అరెస్టు చేస్తున్నట్లు ప్రకటించింది. మధును కూడా విచారించి సాయంత్రమో లేదా రేపో అరెస్టును ప్రకటించవచ్చునన్న ఊహాగానాలు వినిపిస్తున్నాయి. కాగా గతంలో పలుమార్లు కోనేరు మధుకు సిబిఐ నోటీసులు జారీ చేసినప్పటికీ ఆయన నుండి ఎలాంటి స్పందన లేదు.

Published On January 27, 2012