ఎమ్మార్ కేసు: విజయ రాఘవన్‌ను అరెస్టు చేసిన సిబిఐ

By Pratap

Published: Saturday, January 28, 2012, 16:29 [IST]

హైదరాబాద్: ఎమ్మార్ ప్రాపర్టీస్ కుంభకోణం కేసులో మరో అరెస్టు జరిగింది. సిబిఐ అధికారులు ఎమ్మార్ ప్రాపర్టీస్ మాజీ సిఇవో విజయ రాఘవన్‌ను అరెస్టు చేశారు. విజయరాఘవన్‌ను సిబిఐ అధికారులు శనివారం ఉదయం అరెస్టు చేసినట్లు సమాచారం. ఎమ్మార్ ప్రాపర్టీస్ కేసులో ఇది మూడో అరెస్టు. ఇంతకు ముందు స్టైలిష్ హోమ్స్‌కు చెందిన కోనేరు ప్రసాద్‌ను, వైయస్సార్ కాంగ్రెసు పార్టీ అధ్యక్షుడు వైయస్ జగన్ సన్నిహితుడు సునీల్ రెడ్డిని సిబిఐ అధికారులు అరెస్టు చేశారు. విజయ రాఘవన్‌ను సిబిఐ అధికారులు హైదరాబాదులోని నాంపల్లి కోర్టులో హాజరు పరిచారు. విచారణ నిమిత్తం విజయరాఘవన్‌ను 15 రోజుల పాటు తమ కస్టడీకి అప్పగించాలని సిబిఐ అధికారులు కోర్టును కోరారు. విజయ రాఘవన్‌కు ఈ నెల 30వ తేదీ వరకు జ్యుడిషియల్ రిమాండ్ విధిస్తూ కోర్టు ఆదేశాలు జారీ చేసింది.

కాగా, సునీల్ రెడ్డిని విచారణ నిమిత్తం సిబిఐ అధికారులు శనివారం ఉదయం దిల్‌కుషా అతిథి గృహానికి తరలించారు. సునీల్ రెడ్డిని కోర్టు సిబిఐ కస్టడీకి మూడు రోజుల పాటు అప్పగిస్తూ ఆదేశాలు జారీ చేసిన విషయం తెలిసిందే. దీంతో శనివారం ఉదయం నుంచి సునీల్ రెడ్డిని దిల్‌కుషా అతిథి గృహంలో సిబిఐ అధికారులు ప్రశ్నించారు. ఎమ్మార్ ప్రాపర్టీస్ లావాదేవీల్లో విజయ రాఘవన్ పాత్ర ఉన్నట్లు సిబిఐ నిర్ధారణ చేసుకుంది. ఇంతకు ముందు సిబిఐ అధికారులు విజయ రాఘవన్‌ను పలు మార్లు ప్రశ్నించారు. సిబిఐ ప్రత్యేక కోర్టు న్యాయమూర్తి సెలవులో ఉండడంతో ఆర్థిక నేరాల ప్రత్యేక కోర్టు ముందు విజయ రాఘవన్‌ను హాజరు పరిచారు.

Published On January 28, 2012