తెలంగాణపై నా వాదనకు కట్టుబడి ఉన్నా: జెసి

By Pratap

Published: Saturday, January 28, 2012, 15:17 [IST]

హైదరాబాద్: తెలంగాణపై తాను గతంలో చేసిన వాదనకు కట్టుబడి ఉన్నానని కాంగ్రెసు సీనియర్ శాసనసభ్యుడు జెసి దివాకర్ రెడ్డి అన్నారు. ముఖ్యమంత్రి పదవిని మూడేళ్ల పాటు సీమాంధ్రకు, రెండేళ్ల పాటు తెలంగాణకు ఇవ్వాలనేది తన ప్రతిపాదన అని, దానివల్ల తెలంగాణ సమస్య పరిష్కారం అవుతుందని ఆయన శనివారం మీడియా ప్రతినిధులతో అన్నారు. ఈ మేరకు ముఖ్యమంత్రులను మార్చడానికి తెలుగుదేశం పార్టీ కూడా అంగీకరించాలని ఆయన అభిప్రాయపడ్డారు. ముఖ్యమంత్రుల మార్పునకు రాజ్యాంగపరమైన గ్యారంటీ కల్పించాలని ఆయన అన్నారు.

ప్రస్తుత ముఖ్యమంత్రి కిరణ్ కుమార్ రెడ్డిని మార్చాలనేది తన వాదనలోని ఆంతర్యం కాదని ఆయన అన్నారు. 2014 వరకు కిరణ్ కుమార్ రెడ్డి ముఖ్యమంత్రిగా ఉంటారని ఆయన చెప్పారు. ఎన్నికలు ఎప్పుడొచ్చినా ఎదుర్కోవడానికి తమ కాంగ్రెసు పార్టీ సిద్ధంగా ఉందని ఆయన చెప్పారు. తెలంగాణ రాజకీయపరమైన డిమాండేనని, రాజకీయంగానే పరిష్కారమవుతుందని ఆయన అన్నారు.

Published On January 28, 2012