తాగిన మైకంలోనే విగ్రహాల ధ్వంసం, ముగ్గురి అరెస్టు

కాకినాడ/ ఏలూరు: తూర్పు గోదావరి జిల్లా అమలాపురంలో రాజ్యాంగ నిర్మాత బాబా సాహెబ్ అంబేడ్కర్ విగ్రహాల ధ్వంసం కేసులో పోలీసులు ముగ్గురు యువకులను అరెస్టు చేశారు. వారిని శనివారం ఉదయం మీడియా ప్రతినిధుల ముందు ప్రవేశపెట్టారు. ముగ్గురు యువకులు కూడా 20 ఏళ్ల వయస్సు ఉన్నవారే. తాగిన మైకంలోనే వారు విగ్రహాలను ధ్వంసం చేసినట్లు పోలీసు ఉన్నతాధికారులు చెప్పారు. భవిష్యత్తులో ఇటువంటి సంఘటనలు పునరావృతం కాకుండా చూస్తామని వారు హామీ ఇచ్చారు. కాగా, విగ్రహాల విధ్వంసానికి నిరసనగా మాల మాహానాడు శనివారం ఏలూరు బంద్‌కు పిలుపునిచ్చింది. డిపో నుంచి బస్సులు బయటకు రాకుండా ఆందోళనకారులు అడ్డుకున్నారు.

విద్యాసంస్థలు, దుకాణాలు మూత పడ్డాయి. ఆందోళనకారులు పలు చోట్ల రాస్తారోకోలు నిర్వహించారు. ఎడ్లబండ్లతో ర్యాలీ నిర్వహించారు. ఇదిలా వుంటే, తెలుగుదేశం పార్టీ నాయకులు అమలాపురం చేరుకున్నారు. విగ్రహాల విధ్వంసానికి కారుకుడిగా భావిస్తున్న గంధం పల్లంరాజు పరారీలో ఉన్నాడు. ధ్వంసం చేసిన తర్వాత విగ్రహాలను ఎక్కడెక్కడ పడవేసిందీ నిందితులు పోలీసులకు చూపించారు. స్థానిక వ్యవసాయ బావిలో పడేసిన విగ్రహాలను పోలీసులు బయటకు తీసి పోలీసు స్టేషన్‌కు తరలించారు. నాలుగు రోజుల క్రితం అమలాపురంలో అంబేడ్కర్ విగ్రహాల ధ్వంసం సంఘటన తీవ్ర ఉద్రిక్త పరిస్థితులకు దారి తీసింది.

English summary

Police arrested 3 accused in Amalapuram ambedkar statues distruction case.