సునీల్ రెడ్డి కస్టడీ పొడిగింపుపై సిబిఐకి చుక్కెదురు

By Srinivas

Published: Monday, January 30, 2012, 16:41 [IST]

హైదరాబాద్: ఎమ్మార్ కేసులో ఇటీవల అరెస్టైన సునీల్ రెడ్డి కస్టడీ పొడిగింపు విషయంలో సిబిఐకి ప్రత్యేక న్యాయస్థానంలో సోమవారం చుక్కెదురైంది. సునీల్ రెడ్డి కస్టడీ పొడిగించాలని సిబిఐ పిటిషన్ దాఖలు చేసింది. మరో ఏడు రోజుల పాటు తమ కస్టడీకి ఇవ్వాలని కోరింది. దీనిపై విచారణ జరిపిన కోర్టు కస్టడీ పొడిగింపు పిటిషన్‌ను తోసి పుచ్చింది. సునీల్ రెడ్డికి బుధవారం వరకు కోర్టు రిమాండ్ విధించింది. కాగా సునీల్ రెడ్డిని రెండున్నర రోజుల పాటు కోర్టు సిబిఐ కస్టడీకి ఇటీవల ఇచ్చింది. సోమవారంతో కస్టడీ ముగియడంతో సిబిఐ ఆయనను కోర్టులో ప్రవేశ పెట్టింది. అయితే కస్టడీ పొడిగించేందుకు అనుమతించలేదు.

మరోవైపు విజయ రాఘవను తమ కస్టడీకి ఇవ్వాలన్న సిబిఐ పిటిషన్‌ను కూడా కోర్టు డిస్మిస్ చేసింది. అంతకుముందు విజయ రాఘవ తరఫు న్యాయవాది రాఘవపై సిబిఐ థర్డ్ డిగ్రీ ప్రయోగించిందంటూ తన వాదనలు వినిపించిన విషయం తెలిసిందే. ఆ తర్వాత సిబిఐ తరఫు న్యాయవాది తన వాదనలు వినిపించారు. థర్డ్ డిగ్రీ ప్రయోగించారని చెప్పడంలో ఎలాంటి వాస్తవం లేదని కోర్టుకు తెలిపారు. థర్డ్ డిగ్రీ ప్రయోగిస్తే అప్పుడే కోర్టులో అఫిడవిట్ ఎందుకు దాఖలు చేయలేదని అడిగారు. రాఘవను సాక్ష్యాధారాలతోనే విచారిస్తున్నామని, మార్కెట్ రేటు కంటే ఎక్కువ ధరకు విల్లాలు వసూలు చేశారన్నారు. ఆయన అక్రమాలకు ఆధారాలు ఉన్నాయన్నారు.

Published On January 30, 2012