జగన్ చుట్టూ ఉన్న అవినీతిని కాల్చేయాలి: నారాయణ

By Srinivas

Published: Monday, January 30, 2012, 9:55 [IST]

హైదరాబాద్/ఖమ్మం: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి చుట్టూ ఉన్న అవినీతిని కాల్చి వేయాలని సిపిఐ రాష్ట్ర కార్యదర్శి నారాయణ ఆదివారం అన్నారు. ఆయన రాత్రి ఖమ్మం పట్టణంలోని పార్టీ మహాసభలో మాట్లాడారు. అధికారంలో ఉన్న కాంగ్రెసు పార్టీని వదిలి టిఆర్ఎస్ టిడిపిని లక్ష్యంగా చేసుకోవడం సరికాదన్నారు. మన్మోహన్ సింగ్ ప్రభుత్వం అధికారంలో కొనసాగటం కోసం ఒక్కొక్కరికి రూ.5 కోట్లు ఇచ్చి ప్రభుత్వాన్ని నిలుపుకోవడం సిగ్గుచేటు అన్నారు. ఉచిత విద్యుత్ పేరుతో రైతులపై మోపిన బిల్లులు వారు చెల్లించలేక పోతున్నారని ఆవేదన చెందారు. రాష్ట్ర ప్రభుత్వం అన్ని అంశాల్లో విఫలమైందని ఆరోపించారు. ఖమ్మం, కరీంనగర్, నల్గొండ జిల్లాల్లో ఉన్న 1.30 లక్షల వేల ఎకరాలు మైనింగ్ భూములను వైయస్సాఅర్ తన అల్లుడికి కట్టబెట్టారని విమర్శఇంచారు.

కాగా అంతకుముందు హైదరాబాద్‌లో జరిగిన వస్త్ర వ్యాపారుల బంద్ నిరసన కార్యక్రమంలో ఆయన పాల్గొన్నారు. వస్త్రాలపై వ్యాట్ ఎత్తివేయక పోతే మంత్రులు, ముఖ్యమంత్రి బట్టలు లేకుండా సోనియా గాంధీ వద్దకు వెళ్లాల్సి ఉంటుందని ఆయన హెచ్చరించారు. గోచీ గుడ్డను కూడా వదలకుండా పన్ను వేయడంకంటే దరిద్రపు బతుకు ఉండదని ఈసడించారు. పరిస్థితి తీవ్రతను పట్టించుకోకపోతే వస్త్ర వ్యాపారులతోపాటు సామాన్య ప్రజానీకం మొత్తం కలిసి రాష్ట్ర ప్రభుత్వ బట్టలు ఊడదీయాలని పిలుపునిచ్చారు. వ్యాట్ ద్వారా రూ.600 కోట్లు వస్తాయంటున్నారని, గాలి ఆస్తులను స్వాధీనం చేసుకుంటే వేల కోట్లు వస్తాయని అన్నారు. ముఖ్యమంత్రి కిరణ్ తాను పట్టుకున్న కుందేలుకు మూడేకాళ్లు అన్నట్లుగా, గుడ్డిగా వ్యవహరిస్తున్నారని తెలిపారు.

Published On January 30, 2012