తెలంగాణ విషయంలో నా సూచనపై చర్చ జరగాలి: జెసి

By Srinivas

Published: Monday, January 30, 2012, 10:20 [IST]

కర్నూలు: తెలంగాణ విషయంలో తాను చేసిన సూచనలపై సుదీర్ఘ చర్చ జరగాలని మాజీ మంత్రి, అనంతపురం జిల్లా సీనియర్ శాసనసభ్యుడు జెసి దివాకర్ రెడ్డి ఆదివారం అన్నారు. ఆయన శ్రీశైలంలోని శ్రీ భ్రమరాంభ మల్లికార్జున స్వామి వారిని దర్శించుకున్నారు. అనంతరం విలేకరులతో మాట్లాడారు. తెలంగాణ ప్రాంతానికి అభివృద్ధిలో అన్యాయం జరిగినట్లుగా కనబడటం లేదని, కేవలం ముఖ్యమంత్రి పదవి కోసమే ప్రత్యేక తెలంగాణ ఉద్యమాలు చేస్తున్నారని ఆయన అభిప్రాయపడ్డారు. పివి నరసింహా రావు, అంజయ్య, చెన్నారెడ్డి, జలగం వెంగళ రావు ముఖ్యమంత్రులుగా పని చేసిన సమయంలో ఎటువంటి ఉద్యమాలు లేవని ఆయన అన్నారు.

ఆంధ్రా ప్రాంతం వారు ముఖ్యమంత్రి అయినప్పుడే తెలంగాణ డిమాండ్ వస్తోందని అన్నారు. మూడేళ్లు ఆంధ్ర ప్రాంతం వారికి, రెండేళ్లు తెలంగాణ ప్రాంతం వారికి ముఖ్యమంత్రి పదవి ఇచ్చే విధానం అమలు చేస్తే ఇటువంటి సమస్యలు ఉండవన్నారు. ముఖ్యమంత్రి కావాలనే కోరిక ఉన్న వాళ్లు జై తెలంగాణ అంటున్నారని, ఈ రాజకీయ క్రీడలో విద్యార్థులు బలపశువులుగా మారుతున్నారని ఆవేదన వ్యక్తం చేశారు. కాగా ఇటీవల జెసి, మూడేళ్ల ఆంధ్రాకు, రెండేళ్లు తెలంగాణకు అనే ప్రతిపాదన ముందుకు తీసుకు వచ్చిన విషయం తెలిసిందే.

Published On January 30, 2012