మహిళా టీచర్‌కు కరస్పాండెంట్ లైంగిక వేధింపులు

చిత్తూరు: జిల్లాలో మహిళా ఉపాధ్యాయురాలిని వేధిస్తున్న కీచక కరస్పాండెంట్ ఉదంతం మంగళవారం వెలుగు చూసింది. చిత్తూరు జిల్లాలోని బైరాగి పట్టెడలోని ఓ పబ్లిక్ పాఠశాలలో గణితం బోధిస్తున్న విజయలక్ష్మి అనే ఉపాధ్యాయురాలిని పాఠశాల కరస్పాండెంట్ లైంగిక వేధింపులకు గురి చేశాడు. దీంతో విజయలక్ష్మి బంధువులు మంగళవారం ఉదయం పాఠశాల వద్దకు చేరుకొని ఆందోళనకు దిగారు. వేధించిన కీచక కరస్పాండెంట్ వెంటనే బయటకు వచ్చి బహిరంగంగా క్షమాపణ చెప్పాలని డిమాండ్ చేశారు. ఆయనను కఠినంగా శిక్షించాలన్నారు. పోలీసులకు ఫిర్యాదు చేసినట్లు చెప్పారు.

డిస్కషన్స్ ఉన్నాయని తనను కరస్పాండెంట్ తన చాంబర్‌కు పిలిపించారని, ఆ సమయంలో అక్కడ ఎవరూ లేరని విజయలక్ష్మి తెలిపారు. తాను వెళతానని చెప్పడంతో తనను పట్టుకొని రెండుసార్లు లాగాడని, దీంతో బయటకు పరుగెత్తుకొచ్చానని ఆమె చెప్పారు. తాను పాఠశాలలో మేథమెటిక్స్ చెబుతానని తెలిపారు. తాను నాలుగేళ్లుగా టీచర్‌గా పని చేస్తున్నానని, ఇలాంటి ఘటనలు గతంలో ఎన్నడూ జరగలేదన్నారు. తన భర్తకు చెప్పి పోలీసులకు ఫిర్యాదు చేసినట్లు చెప్పారు. కాగా నిందితుడు పరారీలో ఉన్నట్లుగా సమాచారం.

English summary

School correspondent harassed woman teacher sexually. Her relatives demanding to his apology and police action.