గుర్తు తెలియని మృతదేహం, భానుదంటూ వదంతులు

By Srinivas

Published: Wednesday, February 1, 2012, 14:31 [IST]

తిరుపతి: చిత్తూరు జిల్లా తిరుపతి సమీపంలో ఓ గుర్తు తెలియని మృతదేహం బుధవారం కలకలం రేపింది. ఆ మృతదేహం మద్దెలచెర్వు సూరి హంతకుడు భాను కిరణ్‌దేననే వదంతులు జోరుగా వినిపించాయి. రేణిగుంట మండలం గుత్తివారిపల్లి చెరువులో మంగళవారం రాత్రి తొమ్మిది గంటల సమయంలో స్థానికులు ఓ మృతదేహాన్ని గుర్తించారు. ఇదే విషయాన్ని పోలీసులకు సమాచారం అందించారు. అది మృతదేహం కాదని భావించి వారు వెళ్లి పోయారు. బుధవారం కూడా భాను మృతదేహం చెరువులో ఉందని జోరుగా ప్రచారం జరుగుతున్న నేపథ్యంలో పోలీసులు ఉదయం ఎనిమిది గంటల ప్రాంతంలో చెరువు వద్దకు చేరుకున్నారు. శవాన్ని తీసి, గుర్తు పట్టేందుకు ప్రయత్నిస్తున్నారు. ఈ విషయమై సిఐడి అధికారులు స్థానిక పోలీసుల నుండి సమాచారం సేకరించేందుకు ప్రయత్నించారు. వెంటనే వెళ్లి తెలుసుకోవాల్సిందిగా స్థానిక పోలీసులను ఆదేశించారు.

అది భాను కిరణ్ మృతదేహమా కాదా అని తెలుసుకునేందుకు పోలీసులు ప్రయత్నిస్తున్నారు. మృతదేహం గుర్తు పట్టలేని విధంగా ఉండటంతో పోలీసులు పోల్చుకునేందుకు ప్రయత్నాలు చేస్తున్నారు. మరోవైపు మృతదేహం పొట్టిగా, పీలగా ఉండటంతో ఇది భానుది అయ్యే అవకాశం లేదని పోలీసులు చెబుతున్నారు. కాగా అనంతరం రేణిగుంట డిఎస్పీ మాట్లాడుతూ అది భాను కిరణ్ మృతదేహం కాదని, ఆయనదే అన్న వార్తలు కేవలం వదంతులేనన్నారు. పరీక్షలు నిర్వహిస్తామని చెప్పారు.

Published On February 1, 2012