10 రోజులు విజయకాంత్ సస్పెన్షన్, డిఎండికే ఆందోళన

By Srinivas

Published: Thursday, February 2, 2012, 13:25 [IST]

చెన్నై: డిఎండికె అధినేత విజయ్‌కాంత్‌ను అన్నాడిఎంకే అధ్యక్షురాలు, తమిళనాడు ముఖ్యమంత్రి జయలలిత టార్గెట్ చేసుకున్నట్లుగా కనిపిస్తోంది. గురువారం తమిళనాడు శాసనసభ స్పీకర్ విజయ్ కాంత్‌పై వేటు వేశారు. ఆయనను పది రోజుల పాటు సభ నుండి సస్పెండ్ చేశారు. అంతకుముందు రోజు విజయకాంత్ చేసిన అభ్యంతరకర వ్యాఖ్యల కారణంగానే సస్పెండ్ చేసినట్లు స్పీకర్ చెప్పారు. దీంతో డిఎండికె సభ్యులు సభలో ఆందోళన చేశారు. తమ పార్టీ అధినేత విజయ్ కాంత్‌ను సస్పెండ్ ఎందుకు చేస్తున్నారంటూ వారు సభలో గందరగోళం చేశారు. సస్పెన్షన్ వేటును ఎత్తి వేయాలని వారు డిమాండ్ చేశారు. కాగా ఇటీవల విజయకాంత్, జయలలిత మధ్య స్నేహం చెడిన విషయం తెలిసిందే. వీరిరువురు మాటల యుద్ధానికి కూడా దిగారు. బుధవారం విజయకాంత్‌తో సహా డిఎండికె సభ్యులను స్పీకర్ బయటకు పంపించి వేశారు. దీంతో డిఎండికె జయలలితతో వాగ్వాదానికి దిగారు. ఈ వివాదం తర్వాత వారిని బయటకు పంపించి వేశారు. అంతకుముందు ఓ డిఎండికె సభ్యుడు ధరల పెరుగుదలపై ప్రభుత్వాన్ని ప్రశ్నించారు.

ఓ సమయంలో జయలలిత మాట్లాడుతూ విజయకాంత్ మద్దతు లేకపోయినా తామ పార్టీ గెలిచి ఉండేదని అన్నారు. డిఎండికే పార్టీతో చేతులు కలిపినందుకు విచారిస్తున్నామన్నారు. అందుకు విజయకాంత్ ఘాటుగానే స్పందించారు. తమ పార్టీ వల్లనే శాసనసభ ఎన్నికల్లో అన్నాడిఎంకె గెలుపొందిందని అన్నారు. అవసరం తీరాక తమను జయలలిత వెళ్లి పోమంటున్నారని ధ్వజమెత్తారు.

Published On February 2, 2012