జగన్‌కు జూడాలంటే తెలియదు: డిఎల్ రవీంద్రా రెడ్డి

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి జూనియర్ డాక్టర్లంటే (జూడాలంటే) తెలియదని రాష్ట్ర ఆరోగ్య శాఖ మంత్రి డిఎల్ రవీంద్రా రెడ్డి వ్యాఖ్యానించారు. ఎంసిఎ నియమావళి ప్రకారం జూడాలకు స్టయిఫండ్ ఇవ్వాలని జగన్ అంటున్నారని, ఎంసిఎ నియమావళిలో జూడాల వేతనాల గురించి ఎక్కడా చెప్పలేదని, ఎంసిఎ సీట్లు తదితర విషయాల గురించి మాత్రమే మాట్లాడుతుందని ఆయన శనివారం మీడియా ప్రతినిధులతో అన్నారు. జూడాల సమ్మెను తెలుగుదేశం పార్టీ అధ్యక్షుడు నారా చంద్రబాబు నాయుడు ప్రేరేపిస్తున్నట్లుగా ఉందని ఆయన విమర్శించారు. జూడాలకు చంద్రబాబు కల్లబొల్లి కబుర్లు చెబుతున్నారని ఆయన అన్నారు.

సమ్మె విరమిస్తేనే తాము జూనియర్ డాక్టర్లతో చర్చలు జరుపుతామని ఆయన తెగేసి చెప్పారు. చర్చల విషయంలో నిర్ణయం జూడాల చేతుల్లోనే ఉందని ఆయన అన్నారు. జూనియర్ డాక్టర్ల ప్రతిపాదనలపై ప్రభుత్వం చర్చించడానికి సిద్ధంగానే ఉందని ఆయన చెప్పారు. జూనియర్ డాక్టర్ల నిరసన విశాఖపట్నంలో ప్రారంభమై క్రమంగా రాష్ట్రమంతా వ్యాపించిందని ఆయన చెప్పారు. గత ప్రభుత్వాలు స్టయిఫండ్ చెల్లింపులో జాప్యం చేస్తూ పెండింగులో ఉంచాయని, తాను వచ్చిన తర్వాత స్టయిఫండ్ చెల్లింపులను క్రమబద్ధం చేశానని ఆయన చెప్పారు.

English summary

Health Minister DL Ravindra Reddy said that YSR Congress president YS Jagan does not know anout junior doctors.