ఎంత అందమో అంత అవినీతి: శ్రీలక్ష్మిపై నారాయణ

By Pratap

Published: Saturday, February 4, 2012, 14:08 [IST]

విజయవాడ: సిపిఐ కె. నారాయణ మరోసారి తన వాక్చాతుర్యాన్ని ప్రదర్శించారు. కర్ణాటక మాజీ మంత్రి గాలి జనార్దన్ రెడ్డి అక్రమ మైనింగ్ కేసులో అరెస్టయిన ఐఎఎస్ అధికారి శ్రీలక్ష్మిపై ఆయన శనివారం మీడియా ప్రతినిధుల సమావేశంలో సంచలన వ్యాఖ్యలు చేశారు. ఎంత అందంగా ఉంటుందో అంత దరిద్రమైన అవినీతికి పాల్పడిందని ఆయన శ్రీలక్ష్మిని ఉద్దేశించి అన్నారు. మొదట్లో శ్రీలక్ష్మి చాలా నిజాయితీగా ఉండేదని, అప్పుడు చూసి ఈ అమ్మాయి కేంద్ర సర్వీసులు వెళ్తుందని అనుకునేవాడినని ఆయన అన్నారు. రాష్ట్రంలో కొంత మంది నిజాయితీపరులైన ఐఎఎస్ అధికారుల గురించి కూడా ఆయన చెప్పారు. నిజాయితీపరులైన ఐఎఎస్ అధికారులు ఎప్పటికప్పుడు ఎలా బదిలీ అవుతూ వచ్చారో కూడా ఆయన వివరించారు. ఐఎఎస్ అధికారులు సిబిఐ విచారణను తప్పు పట్టడం సరి కాదని, అలా తప్పు పడుతున్నారంటే అవినీతి ఐఎఎస్ అధికారులను ప్రోత్సహిస్తున్నారని చెప్పాల్సి ఉంటుందని ఆయన అన్నారు.

ఓబుళాపురం అక్రమ మైనింగ్ కేసులో ప్రస్తుత హోం మంత్రి, అప్పటి గనుల శాఖ మంత్రి సబితా ఇంద్రారెడ్డి మొదటి ముద్దాయి అని, ఈ కేసులో సబితా ఇంద్రా రెడ్డిని అరెస్టు చేయాలని ఆయన అన్నారు. మద్యం సిండికేట్లకు సంబంధించి అవినీతి నిరోధక శాఖ (ఎసిబి) నివేదికలో ఉన్న అధికారులు, లంచావతారుల పేర్లు బయటపెట్టాలని ఆయన డిమాండ్ చేశారు. మద్యం సిండికేట్ల వ్యవహారానికి సంబంధించి ఆబ్కారీ మంత్రి రాజీనామా చేయాలని ఆయన డిమాండ్ చేశారు. మద్యం సిండికేట్ల వ్యవహారానికి సంబంధించి తాను ఈ నెల 18వ తేదీన నిరాహార దీక్ష చేస్తానని ఆయన చెప్పారు.

Published On February 4, 2012