ఫ్యాక్షనిస్టును హత్య చేసిన వారిని పట్టుకోలేదు: కెటిఆర్

By Srinivas

Published: Sunday, February 5, 2012, 9:27 [IST]

హైదరాబాద్: ఒక ఫ్యాక్షనిస్టును హత్య చేసి పారిపోయిన వ్యక్తిని ఇప్పటి వరకు పట్టుకోలేదని తెలంగాణ రాష్ట్ర సమితి సిరిసిల్ల శాసనసభ్యుడు కల్వకుంట్ల తారక రామారావు శనివారం మండిపడ్డారు. తెలంగాణ భవనంలో ఆటో కార్మికుల సమావేశంలో ఆయన మాట్లాడారు. ఎపి 28, ఎపి 29 రిజిస్ట్రేషన్ ఆటోలు సిటీలోకి రావొద్దని పోలీసులు ఇచ్చిన ఆదేశాలపై హైకోర్టు స్టే ఇవ్వడం తెలంగాణ ఆటో కార్మికుల విజయమన్నారు. అధికార కాంగ్రెస్ పార్టీలో సగం మంది అసాంఘిక శక్తులేనని ఆయన ఆరోపించారు. హైదరాబాద్ పోలీసులకు పనిలేకుంటే ముందుగా వాళ్లను పట్టుకోవాలని సవాల్ చేశారు. నగరంలో ట్రాఫిక్ పోలీసులు అడ్డగోలుగా చలాన్లు రాస్తూ ఆటో డ్రైవర్లపై ప్రతాపం చూపిస్తున్నారని మండిపడ్డారు.

నిరుపేద ఆటో డ్రైవర్లను వేధించే బదులు కాంగ్రెస్‌లోని అసాంఘిక శక్తులను పట్టుకోవచ్చు కదా, వాళ్లను ఎందుకు వదిలేశారని ప్రశ్నించారు. ఒక ఫ్యాక్షనిస్టును హత్య చేసి పారిపోయిన వ్యక్తిని ఇంతవరకు పట్టుకోలేదన్నారు. తెలంగాణ ప్రజల సమస్యలపై ప్రభుత్వాన్ని అసెంబ్లీ బడ్జెట్ సమావేశాల్లో నిలదీస్తామని చెప్పారు. తెలంగాణ కోసం ఆత్మబలిదానం చేసుకున్న అమరవీరుల కుటుంబాలను టిఆర్ఎస్ ఆదుకుంటుందని ఆ పార్టీ సిద్దిపేట శాసనసభ్యుడు హరీష్ రావు వేరుగా చెప్పారు. ఈ విషయంలో వస్తున్న విమర్శల్లో ఎలాంటి వాస్తవం లేదన్నారు. పార్టీ నేతలందరూ ఎవరి స్థాయిలో వారు ఎవరికి తోచినంత వారు అమరుల కుటుంబాలకు, ఉద్యమంలో పాల్గొని రకరకాల ఇబ్బందులు ఎదుర్కొంటున్న వారికి వివిధ రూపాల్లో సాయం చేస్తున్నారని అన్నారు.

Published On February 5, 2012