జగన్ పార్టీలోకి తెలుగుదేశం మాజీ ఎమ్మెల్యే పిన్నింటి

By Srinivas

Published: Sunday, February 5, 2012, 16:22 [IST]

విశాఖపట్నం: వైయస్సార్ కాంగ్రెసు పార్టీలో విశాఖపట్నం జిల్లాకు చెందిన తెలుగుదేశం పార్టీ మాజీ శాసనసభ్యురాలు ఒకరు ఆదివారం ఉదయం చేరారు. ఆ పార్టీ అధినేత, కడప పార్లమెంటు సభ్యుడు వైయస్ జగన్మోహన్ రెడ్డి ఆదివారం విశాఖ పర్యటనకు వెళ్లిన విషయం తెలిసిందే. ఆయన పెదవాల్తేరులో దివంగత ముఖ్యమంత్రి వైయస్ రాజశేఖర రెడ్డి విగ్రహాన్ని ఆవిష్కరించారు. ఈ సందర్భంగా టిడిపి నుండి గతంలో ఈ జిల్లా నుండి ఎమ్మెల్యేగా పని చేసిన పిన్నింటి వరలక్ష్మి పార్టీ చీఫ్ జగన్ సమక్షంలో వైయస్సార్ కాంగ్రెసులో చేరారు. జగన్ ఆమెను సాదరంగా ఆహ్వానించారు. ఆమెతో పాటు పలువురు కార్యకర్తలు పార్టీలో చేరారు.

కాగా అంతకుముందు ఆన విశాఖలో పార్టీ కార్యాలయాన్ని ప్రారంభించారు. స్థానిక నేత వంశీ కృష్ణ నివాసం నుండి బయలుదేరిన జగన్ మద్దిలపాలెంలో పార్టీ నగర కార్యాలయాన్ని ప్రారంభించారు. ఈ కార్యక్రమానికి భారీ సంఖ్యలో కార్యకర్తలు, అభిమానులు తరలి వచ్చారు. జగన్ విశాఖలో, జిల్లాలో రోడ్డు షో నిర్వహించారు. వాస్తవానికి శనివారం ఈ పర్యటన జరగాల్సి ఉన్నప్పటికీ పశ్చిమ గోదావరి జిల్లా నర్సాపురం ఎమ్మెల్యే ప్రసాద రాజు తండ్రి ఆకస్మిక మృతి కారణంగా ఆదివారానికి వాయిదా పడింది. రాజగోపాలపురంలో వైయస్ ఆలయాన్ని ఆవిష్కరించనున్నారు.

Published On February 5, 2012