తెలంగాణ కేసు కొట్టివేయాలంటూ హైకోర్టుకెక్కిన బాబు

By Pratap

Published: Tuesday, February 7, 2012, 8:34 [IST]

హైదరాబాద్: తెలంగాణపై ఇచ్చిన హామీని తాను వెనక్కు తీసుకున్నట్లు దాఖలైన కేసును కొట్టివేయాలని తెలుగుదేశం పార్టీ అధినేత చంద్రబాబు సోమవారం హైకోర్టును ఆశ్రయించారు. ప్రత్యేక రాష్ట్ర ఏర్పాటుపై ఇచ్చిన హామీని బాబు వెనక్కు తీసుకోవడం వల్ల పెద్ద సంఖ్యలో ప్రజలు ఆత్మహత్య చేసుకున్నారని, దీనిపై ఆయనను ప్రాసిక్యూట్ చేయాలని తెలంగాణ జూనియర్ న్యాయవాదుల సంఘం ప్రైవేటుగా ఫిర్యాదు చేసిన విషయం తెలిసిందే. దీనిని విచారించిన సైబరాబాద్‌లోని 11వ మెట్రోపాలిటిన్ మెజిస్ట్రేట్ కేసు నమోదు చేయాలని పోలీసులను ఆదేశించారు.

ఈ మేరకు దర్యాప్తు జరిపిన పోలీసులు ఈ ఫిర్యాదు రాజకీయ ప్రేరేపితమని, తెలంగాణలో చోటుచేసుకున్న ఆత్మహత్యలతో చంద్రబాబుకు సంబంధం లేదని మెజిస్ట్రేట్ కోర్టుకు నివేదిక సమర్పించారు. కానీ, దీనిపై పిటిషనర్లు ప్రొటెక్షన్ పిటిషన్ వేసి తమ వాదనలు వినిపించారు. బాబు ఫిబ్రవరి 9న జరిగే విచారణకు హాజరై వివరణ ఇవ్వాలని మెజిస్ట్రేట్ ఆదేశించారు. దీంతో ఈ కేసును కొట్టి వేయాలంటూ చంద్రబాబు హైకోర్టులో క్వాష్ పిటిషన్ దాఖలు చేశారు.

Published On February 7, 2012