సబితారెడ్డినా తొమ్మిదో సోదరి: మంత్రి ప్రసాద్ కుమార్

By Srinivas

Published: Tuesday, February 7, 2012, 13:45 [IST]

హైదరాబాద్: తనకు ఎనిమిది మంది సోదరీమణులు ఉన్నారని, అలాగే హోంమంత్రి సబితా ఇంద్రా రెడ్డిని తన తొమ్మిదో సోదరి అనుకుంటున్నానని మంత్రి ప్రసాద్ కుమార్ మంగళవారం ఓ ఛానల్ ముఖాముఖిలో అన్నారు. సబితా ఇంద్రా రెడ్డితో తనకు ఎలాంటి విభేదాలు లేవన్నారు. ఆమెతో విభేదాలు కేవలం మీడియా, పత్రికల సృష్టియేనన్నారు. ఆమెతో తనకు విభేదాలు ఉంటే ఫోటో ఇంట్లో ఎందుకు పెట్టుకుంటానని ప్రశ్నించారు. ఇటీవల జరిగిన సబిత కార్యక్రమానికి తాను హాజరు కాకపోవడానికి విభేదాలు కారణం కాదన్నారు. తన మంత్రి పదవి స్వీకారోత్సవం సందర్భంగా ఆమె హాజరు కాకపోయినప్పటికీ తనకు అభినందనలు తెలియజేశారన్నారు. అందరినీ కలుపుకొని పోయి పని చేస్తానని అన్నారు.

మాజీ మంత్రి శంకర రావు స్థానంలో తనను కేబినెట్లోకి తీసుకోలేదన్నారు. తెలంగాణలో తన సామాజిక వర్గానికి చెందిన ప్రతినిధిని తానేనని అన్నారు. తాను మంత్రి పదవి తీసుకోవడంపై తనను తెలంగాణవాదులు ఎవరూ ప్రశ్నించలేదన్నారు. చాలామంది తనకు అభినందనలు తెలిపారని అన్నారు. రాజీనామాలతో తెలంగాణ రాదని అన్నారు. 2014లోపు తెలంగాణపై ఖచ్చితమైన నిర్ణయం వస్తుందని ఆయన ఆశాభావం వ్యక్తం చేశారు. కాగా ప్రసాద్ కుమార్ సోమవారం సాయంత్రం మంత్రిగా ప్రమాణ స్వీకారం చేసిన విషయం తెలిసిందే.

Published On February 7, 2012