డిఎల్‌కు చిరంజీవి వర్గం మంత్రి రామచంద్రయ్య కౌంటర్

By Srinivas

Published: Tuesday, February 7, 2012, 15:20 [IST]

కడప: మంత్రి డిఎల్ రవీంద్రా రెడ్డి వ్యాఖ్యలకు తిరుపతి శాసనసభ్యుడు చిరంజీవి వర్గం మంత్రి సి.రామచంద్రయ్య కౌంటర్ వేశారు. మంత్రి వర్గంలోకి ఎవరిని తీసుకోవాలనేది ముఖ్యమంత్రి ఇష్టానుసారమేనని అన్నారు. సమర్థతను బట్టే ఆయన మంత్రులను నియమిస్తారని అన్నారు. పాలనాపరమైన సర్దుబాటు కోసమే డిఎల్ రవీంద్రా రెడ్డి శాఖలో కోత విధించి ఉంటారని అన్నారు. కేవలం తన శాఖలో మాత్రమే కోత అని డిఎల్ ఎందుకు అనుకోవాలని ప్రశ్నించారు. ఉప ఎన్నికల బాధ్యత ఏ ఒక్కరి పైనో ఉండదని, అది జిల్లాకు చెందిన మంత్రుల అందరి బాధ్యత అన్నారు. ప్రాంతాల వారీగా ముఖ్యమంత్రి సమీకరణలు జరుపుతున్నారని, త్వరలోనే సీనియర్లకు మంత్రివర్గంలో అవకాశం లభిస్తుందని ఆయన అభిప్రాయపడ్డారు.

కాగా అంతకుముందు డిఎల్, తాను పని చేయలేదని శాఖలపై కోత కోసి ఉంటే తనకు మంత్రి పదవే అవసరం లేదని మండిపడిన విషయం తెలిసిందే. తాను ఎవరికీ చెంచాగిరి చేయలేదని, అలా చేయను కూడా అని అన్నారు. తనకు పదవి ఉన్నా లేకున్న ప్రభుత్వ పథకాల వైఫల్యంపై ప్రశ్నిస్తూనే ఉంటానని చెప్పారు. ప్రభుత్వ పథకాలను విమర్శించినందు వల్లనే కోత కోస్తే నన్ను పదవి నుండే తప్పించ వచ్చునని అన్నారు. ఆరోగ్య శాఖలో జరిగిన కొన్ని సంఘటనలకు తాను బాధ్యుడిని కానన్నారు. జూడాల విషయంలో నా వైఫల్యం లేదన్నారు. తనది ముక్కుసూటిగా వ్యవహరించే తత్వమని, ప్రశ్నిస్తూనే ఉంటానని అన్నారు. ఉప ఎన్నికల్లో తన ప్రమేయం ఉండదన్నారు.

Published On February 7, 2012