సినీ నిర్మాత కారును ఎత్తుకెళ్లిన జ్యోతిష్కుడి అరెస్టు

హైదరాబాద్: తెలుగు నిర్మాత శశికుమార్ కారును బలవంతంగా లాక్కుని ఎత్తుకెళ్లిన ఓ జ్యోతిష్కుడిని, అతని ఇద్దరు అనుచరులను హైదరాబాదులోని బేగంపేట పోలీసులు అరెస్టు చేశారు. తన ఐదు లక్షల రూపాయల అప్పు చెల్లించలేదనే కారణంతో అతను నిర్మాతకు చెందిన హోండా సివిక్ కారును ఎత్తుకెళ్లాడు. ఈ సంఘటన సోమవారం సాయంత్రం జరిగింది. కొద్దిసేపటికే పోలీసులు జ్యోతిష్కుడితో పాటు అతని ఇద్దరు అనుచరులను అరెస్టు చేశారు. గోకరాజు, అతని ఇద్దరి అనుచరులు నారాయణ, ఫ్రాన్సిస్‌లు సోమవారం సాయంత్రం నాలుగున్నర గంటల ప్రాంతంలో షాపర్స్ స్టాప్ వద్ద శశికుమార్‌ను, అతని భార్యను కారులోంచి బలవంతంగా దింపేసి, డ్రైవర్ నాయుడిని కూడా దింపేసి కారును ఎత్తుకెళ్లారు. శశికుమార్ 2004లో నాగార్జునతో నేనున్నాను అనే సినిమాను నిర్మించారు.

గోకరాజు శశికుమార్ చేత స్టాంపు పేపర్‌పై బలవంతంగా సంతకాలు చేయించాడు. శశికుమార్ తీసుకున్న అప్పు వ్యవహారంపై కోర్టులో కేసు నడుస్తోందని పోలీసులు చెప్పారు. ఐదు లక్షల రూపాయలు చెల్లించే వరకు కారును ఇవ్వబోనని గోకరాజు శశికుమార్‌కు చెప్పాడు. వెంటనే శశికుమార్ బేగంపేట పోలీసులకు ఫిర్యాదు చేశాడు. పోలీసులు ముషీరాబాద్‌లోని గోకరాజు నివాసంలో ఆ ముగ్గురిని అదుపులోకి తీసుకున్నారు. కారును పోలీసులు స్వాధీనం చేసుకున్నారు. తనకు అత్యవసరంగా డబ్బులు అవసరం కావడంతో గోకరాజు ఈ ప్రణాళిక రచించి అమలు చేసినట్లు చెబుతున్నారు. తాను ముందు రచించుకున్న ప్రణాళిక ప్రకారం శశికుమార్ కదలికలపై నిఘా పెట్టి గోకరాజు ఆ చర్యకు పాల్పడ్డాడు.

English summary

Miffed with a Tollywood producer not repaying a loan of Rs 5 lakh, a self-proclaimed astrologer and two of his associates forcibly pushed the producer and his wife out of their Honda Civic car at Begumpet on Monday evening and sped away with the vehicle.