కుమారుడికి బ్లాక్ ఈగల్ డీలర్‌షిప్: మోపిదేవిపై టిడిపి

By Pratap

Published: Thursday, February 9, 2012, 10:19 [IST]

హైదరాబాద్: మంత్రి పదవిని అడ్డుపెట్టుకొని ఒక ప్రముఖ బీర్ కంపెనీ రాష్ట్రవ్యాప్త అమ్మకం హక్కులను ఆబ్కారీ మంత్రి మోపిదేవి వెంకటరమణ తన కుమారుడికి ఇప్పించుకున్నారని తెలుగుదేశం పార్టీ ప్రధాన కార్యదర్శి వర్ల రామయ్య ఆరోపించారు. సంబంధిత పత్రాలను ఆయన బుధవారం మీడియా ప్రతినిధుల సమావేశంలో విడుదల చేశారు. నిండా 22 ఏళ్లు కూడా లేని తన కుమారుడు రాజీవ్ పేరిట బీర్ కంపెనీ మార్కెటింగ్ హక్కులను మోపిదేవి తీసుకున్నారని ఆయన ఆరోపించారు. రాజీవ్ నిరుడు జూన్ 16న క్రెడెన్స్ వెంచర్ క్యాపిటల్ పేరిట ఒక భాగస్వామ్య సంస్థను రిజిస్టర్ చేయించారని, సరిగ్గా నెల రోజుల్లోనే ఇన్‌బేవ్ ఇంటర్నేషనల్ అనే సంస్థ ఆంధ్రప్రదేశ్‌లో బ్లాక్ ఈగిల్ బీర్ పంపిణీ, మార్కెటింగ్ హక్కులను క్రెడెన్స్ వెంచర్‌కు అప్పగించిందని, మద్యం వ్యాపారంలో తలలు పండిన అనేక కంపెనీలు ఉండగా వీటన్నింటినీ కాదని మంత్రి కుమారుడికే మార్కెటింగ్ అవకాశం దక్కిందని, ప్రభుత్వం నుంచి పనులు చేయించుకొని, దానికి ప్రతిఫలంగా ఈ ప్రయోజనం చేకూర్చారనిసని వర్ల ఆరోపించారు.

రాష్ట్ర ప్రభుత్వం ఎక్సైజ్ అధికారులకు ఒక నీతి, మంత్రికో నీతి పాటిస్తోందని వర్ల మండిపడ్డారు. పది వేలు లంచం తీసుకున్నాడని ఓ ఎక్సైజ్ సీఐని అరెస్టు చేశారని, రూ. పది లక్షలు లంచం తీసుకున్నా మంత్రిని అరెస్టు చేయలేదని ఆయన విమర్శించారు. ముఖ్యమంత్రి మంత్రులను, మంత్రులు ముఖ్యమంత్రిని పరస్పరం బ్లాక్ మెయిల్ చేసుకొంటున్నారని ఆయన అన్నారు. ఇద్దరూ కలిసి ప్రజలను మోసం చేస్తున్నారని ఆయన వ్యాఖ్యానించారు. లిక్కర్ వ్యాపారి నున్న రమణకు బినామీ షాపులు ఉన్నాయని మంత్రి మోపిదేవి అంటున్నారని, తన కుటుంబ సభ్యులకు 31 షాపులు ఉన్నాయని చెప్పిన బొత్సపై కూడా రమణపై తీసుకున్న చర్యలనే తీసుకోవాలని మోపిదేవి కోరగలరా అని ప్రశ్నించారు. తమ పార్టీ ఎమ్మెల్యే వెంకట వీరయ్యకు మద్యం వ్యాపారుల నుంచి డబ్బు ముట్టినట్లు వచ్చిన ఆరోపణలపై పార్టీపరంగా విచారణ జరుపుతామని ఆయన చెప్పారు. అయినా, ప్రతిపక్షంలో ఎమ్మెల్యేవల్ల ఏం ఉపయోగం ఉందని ఆయనకు డబ్బు ఇస్తారని ఆయన అన్నారు.

Published On February 9, 2012