పోర్న్‌గేట్: కర్ణాటక మంత్రులకు శిక్ష పడుతుందా?

By Pratap

Published: Thursday, February 9, 2012, 13:04 [IST]

బెంగళూరు: శాసనసభలో బూతు వీడియో చూసిన కర్ణాటక మంత్రులకు చట్టప్రకారం శిక్ష పడే అవకాశం లేదు. ఐటి చట్టం కింద బూతు చిత్రాలు చూడడం నేరం కాదు. అయితే, బూతు చిత్రాలను సరఫరా చేయడం, ప్రచురించడం, వ్యాప్తి చేయడం మాత్రమే చట్టప్రకారం నేరం అవుతుంది. బూతు చిత్రాలు చూసిన మంత్రులు లక్ష్మణ్ సావది, సిసి పాటిల్‌లపై సైబర్ పోలీసులు కేసు నమోదు చేసే అవకాశాలు లేవు. అయితే, చిత్రాలను ఫార్వర్డ్ చేసిన మంత్రి కృష్ణ పలెమార్‌పై మాత్రమే కేసు నమోదు చేయడానికి వీలుంది. అసభ్యకరమైన ఎలక్ట్రానిక్ సమాచారాన్ని పంపించినందుకు పలేమార్‌ శిక్షార్హుడవుతాడని అంటున్నారు.

అశ్లీల చిత్రాలను ఎక్కడ చూశారు, ఎవరి ప్రయోజనాలకు విఘాతం కలిగించారనే విషయాలు చట్టపరిధిలోకి రావు. చట్టంలోని లోపాలే అందుకు కారణమని నిపుణులు అంటున్నారు. బూతు చిత్రాలు చూస్తూ చట్టసభలో దొరికిపోవడం దేశ చరిత్రలో ఇదే మొదటిసారి. కర్ణాటక మంత్రులు శాసనసభలో బూతు చిత్రాలను వీక్షించడం నైతికమైన అంశం కిందికి మాత్రమే వస్తుంది. పైగా, ప్రజలకు మార్గదర్శకత్వం వహించాల్సిన నేతలు అనైతిక కార్యకలాపాలకు పాల్పపడడం ప్రశ్నార్హంగా మారింది. దానికి బాధ్యత వహిస్తూ మంత్రులు ఇప్పటికే రాజీనామా చేశారు. వారి శానససభా సభ్యత్వాలను కూడా రద్దు చేయాలని ప్రతిపక్షాలు డిమాండ్ చేస్తున్నాయి.

Published On February 9, 2012