ముక్కు నేలకు రాస్తావా?: కెసిఆర్‌కు తలసాని సవాల్

హైదరాబాద్: తమ పార్టీ అధినేత నారా చంద్రబాబు నాయుడుపై విమర్శలు చేసిన తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుకు తెలుగుదేశం పార్టీ నేత, మాజీ మంత్రి తలసాని శ్రీనివాస్ యాదవ్ సవాల్ విసిరారు. ఉప ఎన్నికల్లో తెలుగుదేశం పార్టీకి పది శాతం ఓట్లు రావన్న కెసిఆర్ పైన మండిపడ్డారు. టిఆర్ఎస్‌కు తొంబై శాతం ఓట్లు వస్తే తాను అబిడ్స్‌లో ముక్కును నేలకు రాస్తానని, టిడిపికి పది శాతం ఓట్లు వస్తే కెసిఆర్ తన ముక్కును అక్కడే రాస్తారా అని సవాల్ విసిరారు. సర్వేల పేరుతో తెలంగాణ ప్రజలను మభ్య పెట్టాలని కెసిఆర్ ప్రయత్నాలు చేస్తున్నారని విమర్శించారు. టిడిపిపై అక్కసుతోనే ఆయన విమర్శలు చేస్తున్నారన్నారు. పోలవరం టెండర్లపై కెసిఆర్ ఎందుకు మాట్లాడటం లేదని ప్రశ్నించారు.

తమ పార్టీలో కెసిఆర్ వంటి సంస్కారం లేని వ్యక్తులే లేరని అన్నారు. త్వరలో ఉప ఎన్నికలు ఉన్నాయని, అందులో లబ్ధి పొందేందుకే ఆయన ఇప్పుడు బయటకు వస్తున్నారని ఆరోపించారు. టిడిపిలో ఉన్నప్పుడు చంద్రబాబుపై పొగడ్తలు గుప్పించిన కెసిఆర్ ఇప్పుడు విమర్శలు చేయడం సరికాదన్నారు. కెసిఆర్ నోటిని అదుపులో పెట్టుకోకపోతే బాగుండదని మరో నేత సోమిరెడ్డి చంద్రమోహన్ రెడ్డి వేరుగా హెచ్చరించారు. నాలుగ తెగ్గోస్తే పది నాలుకలు తెగి పడతాయని హెచ్చరించారు.

English summary

TDP senior leader Talasani Srinivas Yadav challenged TRS chief K Chandrasekhar Rao about bypoll. Somireddy Chandramohan Reddy warned KCR.