రేవంత్ రెడ్డి, మంత్రి డికె అరుణ మధ్య తిట్లపురాణం

By Pratap

Published: Saturday, February 11, 2012, 13:37 [IST]

మహబూబ్‌నగర్: మంత్రి డికె అరుణ, తెలుగుదేశం శాసనసభ్యుడు రేవంత్ రెడ్డి పరస్పరం తిట్ల దండకానికి ఎత్తుకున్నారు. మహబూబ్‌నగర్ జిల్లా సమీక్షా సమావేశంలో ఇద్దరి మధ్య మాటల యుద్ధం సాగింది. ఇద్దరు పరస్పరం తీవ్ర వ్యాఖ్యలు చేసుకున్నారు. ప్రోటోకాల్ పాటించడం లేదని రేవంత్ రెడ్డి అరుణను విమర్శించారు. గుండాలతో రేవంత్ రెడ్డి శిలాఫలకాలను ధ్వంసం చేయిస్తున్నారని మంత్రి ఆరోపించారు. నువ్వెంత నీ లెక్కెంత అని అని అరుణ రేవంత్ రెడ్డిపై విరుచుకుపడ్డారు.

మద్యం, ఇసుక సిండికేట్లను అరుణ ప్రోత్సహిస్తున్నారని ఆయన విమర్శించారు. మద్యం సిండికేట్లపై నీ భరతం పడతానని రేవంత్ రెడ్డి అరుణను ఉద్దేశించి అన్నారు. కామన్ సెన్స్ లేదని రేవంత్ రెడ్డి అరుణను అంటే యూజ్‌లెస్ ఫెల్లో అంటూ ఆమె ఎదురు దాడికి దిగారు. నీకు సంస్కారం లేదంటే నీకు లేదని పరస్పరం దూషించుకున్నారు. నోరు అదుపులో పెట్టుకోవాలని అరుణ రేవంత్ రెడ్డికి సూచించారు. తాను నోరు విప్పితే ఏమవుతుందో తెలియదని ఆయన అన్నారు.

Published On February 11, 2012