పిఆర్పీ విలీన ఒప్పందంలో భాగమే భవానీ: రాఘవులు

By Srinivas

Published: Sunday, February 12, 2012, 13:27 [IST]

హైదరాబాద్: కాంగ్రెసు పార్టీ, తిరుపతి శాసనసభ్యుడు చిరంజీవి స్థాపించిన ప్రజారాజ్యం పార్టీ విలీన ఒప్పందంలో భాగంగానే కృష్ణా జిల్లాలోని భవానీ ద్వీపాన్ని చిరంజీవి వర్గానికి చెందిన మంత్రి గంటా శ్రీనివాస రావుకు అప్పగించారని సిపిఎం రాష్ట్ర కార్యదర్శి రాఘవులు ఆదివారం హైదరాబాదులో ఆరోపించారు. ఇటీవల మద్యం సిండికేట్లపై ఎసిబి దాడులు రాజకీయ ప్రమేయంతోనే జరుగుతున్నాయని ఆయన అనుమానం వ్యక్తం చేశారు. రాష్ట్రంలో ఉన్న ఐదు లక్షల మంది కాంట్రాక్టు ఉద్యోగులను తొలగించేందుకే ముఖ్యమంత్రి కిరణ్ కుమార్ రెడ్డి యువకిరణాలు పథకాన్ని ప్రవేశ పెట్టారని విమర్శించారు. మంత్రుల జీతాలు పెంచడానికి నిధులు ఉంటాయి కానీ జూనియర్ డాక్టర్ల జీతాలు పెంచడానికి నిధులు లేవా అని ఆయన ప్రశ్నించారు. న్యాయమైన జుడాల దీక్షపై ప్రభుత్వం స్పందించక పోవడం శోచనీయం అన్నారు. ఈసారి అసెంబ్లీలో ప్రజా సమస్యలపై చర్చించాలని ఆయన అధికార, విపక్షాలకు సూచించారు. ప్రజా సమస్యలు చర్చకు రాకుండా నిరోధించేందుకు అధికార పార్టీ ప్రతిసారి ప్రయత్నాలు చేస్తోందన్నారు.

కాగా రెండు రోజుల క్రితం పర్యాటక శాఖ మంత్రి వట్టి వసంత్ కుమార్ విజయవాడలో మాట్లాడుతూ... భవానీ ద్వీపం మంత్రి గంటా శ్రీనివాస రావు కంపెనీకి కట్టబెట్టిన విషయాన్ని స్పష్టం చేసిన విషయం తెలిసిందే. గంటా కంపెనీకి కాంట్రాక్టు కేటాయించడంపై విపక్షాలు ఎప్పటి నుండో ఆందోళన చేస్తున్నప్పటికీ మంత్రి రెండు రోజుల క్రితం ఈ అంశంపై నోరు మెదిపారు.

Published On February 12, 2012