ఇద్దరేనా?: సభాసంఘంపై లేఖ రాయనున్న టిడిపి

By Srinivas

Published: Sunday, February 12, 2012, 12:38 [IST]

హైదరాబాద్: ప్రభుత్వం ఏర్పాటు చేసిన భూకేటాయింపుల సభా సంఘంపై తెలుగుదేశం పార్టీ నేతలు అసంతృప్తి వ్యక్తం చేస్తున్నారు. ఎనబైకి పైగా ఉన్న తెలుగుదేశం పార్టీ ఎమ్మెల్యేల నుండి కేవలం ఇద్దరికే సభా సంఘంలో చోటు కల్పించడం పట్ల టిడిపి గుర్రుగా ఉంది. దీంతో సభా సంఘాన్ని బహిష్కరించే యోచనలో ఆ పార్టీ నేతలు ఉన్నారు. కనీసం నలుగురైదురికి చోటు కల్పించాల్సి ఉండేదని వారు భావిస్తున్నారు. ప్రభుత్వం ఏర్పాటు చేసిన సభా సంఘం అభ్యంతరకరంగా ఉందంటూ టిడిపి విప్ దూళిపాళ్ల నరేంద్ర స్పీకర్ నాదెండ్ల మనోహర్‌కు లేఖ రాయనున్నారని తెలుస్తోంది. సభ్యుల నియామకం ఏకపక్షంగా ఉందని ఆయన స్పీకర్ దృష్టికి తీసుకు వెళ్లనున్నారు. విధివిధానాలు, ఎమ్మెల్యేల సంఖ్యను మార్చకపోతే సభా సంఘాన్ని బహిష్కరించేందుకే ఆ పార్టీ నిర్ణయించుకున్నట్లుగా తెలుస్తోంది.

కాగా 2004 - 2009 మధ్య కాలంలో జరిగిన భూకేటాయింపులపై ప్రభుత్వం ఇటీవల సభా సంఘాన్ని ఏర్పాటు చేసిన విషయం తెలిసిందే. ఇందులో తెలుగుదేశం పార్టీ నుండి మాజీ మంత్రి అశోక గజపతి రాజు, ఆ పార్టీ సీనియర్ నేత పయ్యావుల కేశవ్‌కు చోటు కల్పించారు. అయితే ఈ పేర్లు కూడా టిడిపిని సంప్రతించకుండనే నియమించినట్లు తెలుస్తోంది.

Published On February 12, 2012