పెళ్లి మండపంలో వధువుపై కత్తితో బావ దాడి!, విషమం

By Srinivas

Published: Sunday, February 12, 2012, 14:54 [IST]

కర్నూలు/హైదరాబాద్: కర్నూలు జిల్లాలో ఆదివారం దారుణం జరిగింది. తనను పెళ్లి చేసుకోలేదని ఓ యువకుడు పెళ్లి కూతురిపై పెళ్లి మంటపంలోనే దాడి చేశారు. జిల్లాలోని కోడమూరులో కామాక్షి అనే యువతి పెళ్లి జరుగుతోంది. ఇంతలో ఆమె మేనబావ వచ్చి ఆమెపై కత్తితో దాడి చేశారు. తనను కాదని మరో యువకుడిని పెళ్లి చేసుకున్నందుకు ఆమెపై కత్తితో దాడి చేశాడు. ఆమె పరిస్థితి విషమంగా ఉండటంతో వెంటనే ఆసుపత్రికి తరలించారు. దీంతో పెళ్లి ఆగిపోయింది. ఆ తర్వాత దాడి చేసిన వ్యక్తి కూడా ఆత్మహత్యా యత్నం చేశాడు. అయితే ఆయన దాడి చేయలేదనే మరో వాదన కూడా వినిపిస్తోంది. తన మరదలు వేరే వ్యక్తిని పెళ్లి చేసుకుంటుందని తెలిసిన బావ పెళ్లి మండపం వద్దకు వచ్చి తనను తాను బ్లేడుతో కోసుకున్నాడని, ఆయనకు తీవ్ర రక్తస్రావం అయిందంటున్నారు. దీనిని చూసిన పెళ్లి కూతురు సొమ్మసిల్లి పడిపోయినట్లుగా చెబుతున్నారు. వారిని చికిత్స కోసం ఆసుపత్రికి తరలించారు. కాగా పెళ్లి కూతురు మీనాక్షి తనకన్నా చిన్న వయస్సులో ఉన్న మేన బావతో చనువుగా ఉండేదని, దానినే అతను ప్రేమగా భావించారని చెబుతున్నారు.

హైదరాబాదులో ముగ్గురు స్నేహితులు యాక్సిడెంట్ కారణంగా మృతి చెందారు. రంగారెడ్డి జిల్లాలోని హయత్ నగర్ మండలం తట్టి అన్నారం వద్ద ముగ్గురు విద్యార్థులు తన స్నేహితుడు పుట్టిన రోజు వేడుకలకు హాజరై తిరిగి వస్తుండగా వారి బైకు విద్యుత్ స్తంభానికి ఢీకొట్టింది. దీంతో వారు అక్కడికక్కడే మృతి చెందారు. వారు ముగ్గురు ఇంటర్ విద్యార్థులే. వరంగల్ జిల్లాలోని వర్ధన్నపేట జాతీయ రహదారి పైన ఒక ఆయిల్ ట్యాంకర్ బోల్తా పడింది. రోడ్డు పైన ఆయిల్ కారిపోయింది.

Published On February 12, 2012