చిక్కుల్లో గిలానీ, నేరారోపణపై సుప్రీంకోర్టుకు హాజరు

By Pratap

Published: Monday, February 13, 2012, 12:15 [IST]

ఇస్లామాబాద్: పాకిస్తాన్ ప్రధాని యూసుఫ్ రజా గిలానీ సోమవారం సుప్రీంకోర్టు ముందు హాజరయ్యారు. కోర్టు ధిక్కరణ ఆరోపణపై ఆయన సుప్రీంకోర్టుకు వచ్చారు. గిలానీ మెడకు ఎన్‌ఆర్‌వో కుంభకోణం ఉచ్చు బిగిసింది. దీంతో ఆయన పూర్తిగా చిక్కుల్లో పడినట్లే. గిలానీ ప్రధాని పదవికి రాజీనామా చేసే అవకాశాలున్నట్లు ప్రచారం జరుగుతోంది. గిలానీ కోర్టు ధిక్కారానికి పాల్పడ్డారని సుప్రీంకోర్టు ఆరోపించింది. అయితే, తనకు జైలు కొత్త కాదని, జైలుకు వెళ్లడానికి సిద్ధంగా ఉన్నానని గిలానీ అంటున్నారు.

తాజా పరిణామాలతో పాకిస్తాన్‌లో రాజకీయ సంక్షోభం ఏర్పడే ప్రమాదం ఉంది. పాకిస్తాన్ అధ్యక్షుడు ఆసిఫ్ అలీ జర్జారీ స్విట్జర్లాండ్‌కు డబ్బులు తరలించిన కేసును తిరిగి చేపట్టాలని తాము చేసిన ఆదేశాలను గిలానీ ధక్కరించారని ప్రధాన న్యాయమూర్తి ఇఫ్తెకార్ చౌధురి నేతృత్వంలోని సుప్రీంకోర్టు విమర్శిస్తూ కోర్టు ధిక్కరణ అభియోగం మోపింది.

గిలానీ స్వయంగా కారు నడుపుతూ సుప్రీంకోర్టుకు వచ్చారు. తన అభిమానుల వైపు చేయి ఊపుతూ ఆయన అభివాదం చేశారు. ఆ తర్వాత కోర్టు గదిలోకి వెళ్లారు. కోర్టులో అంతర్గత వ్యవహారాల మంత్రి రెహ్మాన్ మాలిక్ కూడా ఉన్నారు.

Published On February 13, 2012