సిఎల్పీ సమావేశానికి చిరంజీవి దూరం, ఎమ్మెల్యేలూ

By Pratap

Published: Thursday, February 16, 2012, 12:39 [IST]

హైదరాబాద్: కాంగ్రెసు లెజిస్లేచర్ పార్టీ (సిఎల్‌పి) సమావేశానికి చిరంజీవి హాజరు కావడం లేదు. ఈ విషయాన్ని ఆయన స్వయంగా చెప్పారు. సిఎల్పీ సమావేశం గురువారం సాయంత్రం జరగనుంది. ప్రజారాజ్యం పార్టీ శానససభ్యులను కూడా ఈ సమావేశానికి కాంగ్రెసు పార్టీ ఆహ్వానించింది. కానీ, చిరంజీవితో పాటు ప్రజారాజ్యం పార్టీ శానససభ్యులు ఈ సమావేశానికి దూరంగా ఉంటున్నారు. సాంకేతిక కారణాల వల్లనే తాము సిఎల్పీ సమావేశానికి హాజరు కావడం లేదని వారు చెబుతున్నారు.

శాసనసభలో ప్రజారాజ్యం పార్టీ కాంగ్రెసు పార్టీలో సాంకేతికంగా విలీనం కాలేదు. విలీనానికి ప్రజారాజ్యం లెజిస్లేచర్ పార్టీ స్పీకర్‌ నాదెండ్ల మనోహర్‌కు గత శానససభా సమావేశాల సమయంలోనే లేఖ ఇచ్చారు. అయితే, విలీనాన్ని ఆమోదిస్తూ సిఎల్పీ తీర్మానం చేసి, స్పీకరుకు పంపాల్సి ఉంటుంది. ఈ ప్రక్రియ పూర్తి కాలేదు. గురువారం జరిగే సిఎల్పీ సమావేశంలో ఆ మేరకు తీర్మానం చేస్తారని భావిస్తున్నారు. అదే సమయంలో చిరంజీవిని శాసనసభా పక్ష ఉప నేతగా కూడా సిఎల్పీ ఎన్నుకుంటుందని అంటున్నారు. అయితే చిరంజీవి గైర్హాజరీ వల్ల అది సాధ్యమవుతుందా, లేదా అనేది తెలియడం లేదు.

Published On February 16, 2012