జగన్‌ స్థాపించిన వైయస్సార్సీతో పొత్తుండదు:నారాయణ

By Srinivas

Published: Monday, February 20, 2012, 9:47 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డితో ఇప్పుడు గానీ భవిష్యత్తులోగానీ పొత్తు పెట్టుకునే ఆలోచనే లేదని సిపిఐ రాష్ట్ర కార్యదర్శి నారాయణ ఆదివారం స్పష్టం చేశారు. తండ్రి అవినీతి సంపదతో పాటు ముఖ్యమంత్రి పదవి వారసత్వంగా కావాలంటూ ఆయన ప్రారంభించిన పార్టీని అసలు పరిగణలోకి తీసుకోమన్నారు. ఉప ఎన్నికల్లో పొత్తులు, పోటీపై పార్టీ మహాసభల్లో చర్చించాకే నిర్ణయిస్తామని చెప్పారు. ఆయన ఓ పత్రిక ఇంటర్వ్యూలో ఈ విషయాలు చెప్పారు. అవినీతి నేపథ్యంలో ప్రారంభించిన ఆ పార్టీకి మద్దతిచ్చేది లేదన్నారు. ఎమ్మార్ ప్రాపర్టీస్, ఓబుళాపురం అక్రమాలపై, బయ్యారం గనులపై పోరాటం చేశామన్నారు. ఇకముందు కూడా అవినీతిపై పోరాటం చేస్తామన్నారు. 2009లో టిడిపితో కలిసి ఎన్నికలకు వెళ్లామని 2014లో కూడా వెళ్లే అవకాశముందన్నారు.

కర్నాటక మాజీ మంత్రి గాలి జనార్ధన రెడ్డి ఓఎంసి అక్రమాల కేసులో అరెస్టైన శ్రీలక్ష్మి యంగెస్ట్ సీనియర్ ఐఏఎస్ అధికారిణి అని, సక్రమంగా విధులు నిర్వహిస్తే జాతీయ కేడర్‌కు వెళ్లే వారని, అవినీతి కుంభకోణాల్లో కూరుకుపోయి అన్యాయంగా జైల్లోకి వెళ్లిందనే బాధతో ఆమెపై కామెంట్ చేశాను కాని వ్యంగ్యంగా అనలేదన్నారు. ప్రధాన మంత్రి మన్మోహన్ సింగ్ కనుసన్నుల్లోనే కుంభకోణాలు జరుగుతున్నాయి కాబట్టి ప్రజల ఆవేశాన్ని ప్రతిబింబించాలనే ప్రయత్నంలోనే ఆయనను ఉరితాయాలని వ్యాఖ్యానించానన్నారు. అన్ని దుకాణాల్లో చందాలు తీసుకున్నట్టు తాము మద్యం దుకాణాల నుండి తీసుకున్నామని నారాయణ చెప్పారు. అంతేకానీ సిండికేట్ల వద్దకు వెళ్లి వారికి అండగా నిలవలేదన్నారు.

Published On February 20, 2012