జగన్ అభ్యర్థి గెలుస్తాడు: ఉప పోరుపై శంకర రావు జోస్యం

By Srinivas

Published: Thursday, February 23, 2012, 10:33 [IST]

హైదరాబాద్: ఉప ఎన్నికల ఫలితాలపై మాజీ మంత్రి, కంటోన్మెంట్ శాసనసభ్యుడు శంకర రావు బుధవారం జోస్యం చెప్పారు. శ్రీ పొట్టి శ్రీరాములు నెల్లూరు జిల్లాలోని కొవ్వూరు నియోజకవర్గంలో వైయస్సార్ కాంగ్రెసు పార్టీ తరఫున బరిలోకి దిగుతున్న నల్లపురెడ్డి ప్రసన్న కుమార్ రెడ్డి తప్పకుండా విజయం సాధిస్తారని ఆయన చెప్పారు. వరంగల్ జిల్లా స్టేషన్ ఘనపూర్ నియోజకవర్గంలో జరిగే ఉప ఎన్నికల్లో కొద్దిగా కష్టపడితే తెలుగుదేశం పార్టీ అభ్యర్థి కడియం శ్రీహరి గెలుపొందటం ఖాయమన్నారు. మిగిలిన చోట్ల తెలంగాణ రాష్ట్ర సమితి గెలుస్తుందని ఆయన అన్నారు. ముఖ్యమంత్రి కిరణ్ కుమార్ రెడ్డిని పదవి నుండి తొలగించేందుకు ఆగస్టు పదిహేనవ తేది చివరి గడువు అని, ఈ లోగా స్థానిక సంస్థల ఎన్నికలు జరిగితే వాటి ఫలితాల అనంతరం తొలగిస్తారని అన్నారు.

త్వరలో మరో నలుగురు చర్లపల్లి, చంచలగూడ జైలుకు వెళతారని అన్నారు. ఎక్సైజ్ శాఖ మంత్రి మోపిదేవి వెంకట రమణ, హోంమంత్రి సబితా ఇంద్రా రెడ్డిల గురించి తాను చెప్పింది ఇప్పుడు నిజమవుతున్నాయన్నారు. మోపిదేవిపై తాను చేసిన ఆరోపణలు ఇప్పుడు రుజువవుతున్నయని చెప్పారు. సిఎం కిరణ్ పరిస్థితి కూడా అదే అన్నారు.

Published On February 23, 2012