నేనలా అనలేదు, రిసెప్షన్‌పై చర్చకు సిద్ధం: నారాయణ

By Srinivas

Published: Thursday, February 23, 2012, 15:31 [IST]

కరీంనగర్: తాను అసెంబ్లీని పందుల దొడ్డి అనలేదని బందెల దొడ్డి అని మాత్రమే అన్నానని సిపిఐ రాష్ట్ర కార్యదర్శి నారాయణ గురువారం స్పష్టం చేశారు. తన వ్యాఖ్యలను వక్రీకరించారని దీనిపై తాను ఎలాంటి విచారణకైనా సిద్ధమని అన్నారు. తనపై సభా హక్కుల ఉల్లంఘన నోటీసులు ఇవ్వడం బాధాకరమన్నారు. తాను అనని వ్యాఖ్యలు తనకు ఆపాదించారన్నారు. స్పీకర్ నోటీసులు తనకు అందగానే దీనిపై స్పందిస్తానని చెప్పారు. స్పీకర్‌కు తాను వివరణ ఇస్తానని అన్నారు. తనపై కక్షతో ఉద్దేశ్య పూర్వకంగానే సభా హక్కుల ఉల్లంఘన నోటీసులు ఇచ్చారని ఆయన అన్నారు. తన వ్యాఖ్యలపై విచారణ జరపాలని ఆయన డిమాండ్ చేశారు.

శ్రీకాకళంలో పరీక్ష కేంద్రాన్ని పెళ్లి విందు వేడుకలకు ఇచ్చి అధికార దుర్వినియోగానికి పాల్పడ్డారని దీనిపై మంత్రి ధర్మాన ప్రసాద రావు సమాధానం చెప్పాలని డిమాండ్ చేశారు. ధర్మాన విసిరిన సవాల్‌ను తాను స్వీకరిస్తున్నానని అన్నారు. శ్రీకాకుళంలో కూడా తాను చర్చకు సిద్ధంగా ఉన్నానని చెప్పారు. కాగా ఉదయం మంత్రి ధర్మాన అసెంబ్లీ మీడియా పాయింట్ వద్ద మాట్లాడుతూ.. తాను ఎలాంటి అధికార దుర్వినియోగానికి పాల్పడలేదని తాను బహిరంగ చర్చకు సిద్దమని నారాయణకు ప్రతి సవాల్ విసిరిన విషయం తెలిసిందే.

Published On February 23, 2012