చంద్రబాబు, కిరణ్ కుమార్ తీరుపై వెంకయ్య అసంతృప్తి

By Srinivas

Published: Saturday, February 25, 2012, 14:41 [IST]

హైదరాబాద్: అసెంబ్లీలో ముఖ్యమంత్రి కిరణ్ కుమార్ రెడ్డి, ప్రతిపక్ష నేత చంద్రబాబు నాయుడు తీరుపై భారతీయ జనతా పార్టీ అగ్రనేత వెంకయ్య నాయుడు శనివారం అసంతృప్తి వ్యక్తం చేశారు. వారి తీరు శాసనసభ ప్రతిష్ట దిగజార్చేలా ఉందన్నారు. కిరణ్, బాబు తీరు బాగాలేదన్నారు అసెంబ్లీ విలువలు పడిపోతున్నాయని ఆయన ఆవేదన వ్యక్తం చేశారు. పరస్పర ఆరోపణలతో ప్రతిష్ట దిగజార్చుతున్నారన్నారు. ఎక్సైజ్ శాఖ మంత్రి మోపిదేవి వెంకట రమణకు ముఖ్యమంత్రి కిరణ్ కుమార్ రెడ్డి క్లీన్ చిట్ ఎలా ఇస్తారని ప్రశ్నించారు. విచారణ జరుగుతుండగానే క్లీన్ చిట్ ఇవ్వడం శోచనీయమన్నారు. మహబూబ్ నగర్‌లో తమకు పోటీ చేసే హక్కు ఉందన్నారు. ఎవరు నిజాయితీగా తెలంగాణ సాధిస్తారో ప్రజలకు తెలుసునని చెప్పారు.

జాతీయ ఉగ్రవాద వ్యతిరేక కేంద్రం ఏర్పాటులో యుపిఏ ప్రభుత్వం ఏకపక్షంగా వ్యవహరించిందని ఆయన మండిపడ్డారు. కేంద్రం వెంటనే దీనిపై అన్ని రాష్ట్రాల ముఖ్యమంత్రులతో సమావేశం ఏర్పాటు చేయాలని సూచించారు. రాష్ట్రాల అభిప్రాయంతో ముందుకు వెళ్లాలని అన్నారు. ఉగ్రవాదంపై కేంద్ర, రాష్ట్ర ప్రభుత్వాలు కలిసి కట్టుగా పోరాడాలని సూచించారు.

Published On February 25, 2012