తెలంగాణకు బాబే అడ్డంకని ప్రచారం చేస్తా: దామోదరరెడ్డి

By Srinivas

Published: Monday, February 27, 2012, 12:40 [IST]

హైదరాబాద్: తెలుగుదేశం పార్టీ అధినేత నారా చంద్రబాబు నాయుడే తెలంగాణకు అడ్డంకి అని తాను ఉప ఎన్నికల్లో ప్రచారం చేస్తానని మాజీ మంత్రి, కాంగ్రెసు పార్టీ సీనియర్ నేత రాంరెడ్డి దామోదర రెడ్డి సోమవారం అన్నారు. వచ్చిన తెలంగాణను అడ్డుకున్నది చంద్రబాబే అని ఆరోపించారు. చంద్రబాబు మాట మార్చకుంటే కేంద్రం ప్రకటన మేరకు తెలంగాణ ఇచ్చేదన్నారు. తెలంగాణలోని ఉప ఎన్నికల నియోజకవర్గాలలో బాబు ప్రచారానికి వచ్చే ముందు తన వైఖరి స్పష్టం చేయాలని డిమాండ్ చేశారు. టిడిపి తెలంగాణపై తన వైఖరి చెప్పకుంటే ఉప ఎన్నికల్లో దరావత్తు కూడా దక్కించకుండా ప్రజలు ఆ పార్టీకి గట్టి బుద్ధి చెబుతారన్నారు.

మహబూబ్ నగర్ నియోజకవర్గంలో కాంగ్రెసు పార్టీకి మంచి అవకాశాలు ఉన్నాయని ఆయన ఆశాభావం వ్యక్తం చేశారు. నేను ఉప ఎన్నికల ప్రచారానికి వెళతానని అన్నారు. తెలంగాణ సాధించుకునే దిశలో ఉద్యమిస్తామన్నారు. ఉప ఎన్నికల్లో కాంగ్రెసు పార్టీ విజయం ఖాయమన్నారు. మా కుటుంబానికి మద్యం వ్యాపారంతో ఎలాంటి సంబంధాలు లేవని ఆయన చెప్పారు. తమకు ఎలాంటి పరిశ్రమలు కూడా లేవన్నారు. కీలక పదవులు తెలంగాణ వారికి ఇవ్వాలని ఆయన ఈ సందర్భంగా డిమాండ్ చేశారు.

Published On February 27, 2012