ప్యాకేజ్ పేరుతో కాంగ్రెస్ కొత్త నాటకం: హరీష్ రావు

By Srinivas

Published: Tuesday, February 28, 2012, 11:22 [IST]

హైదరాబాద్: ప్యాకేజీలు, మండలి పేరుతో కాంగ్రెసు పార్టీ కొత్త నాటకానికి తెరలేపిందని తెలంగాణ రాష్ట్ర సమితి సిద్దిపేట శాసనసభ్యుడు హరీష్ రావు మంగళవారం అన్నారు. ప్యాకేజీలు, ప్రత్యేక మండళ్లు తెలంగాణ ప్రజలు ఒప్పుకోరని అన్నారు. ఎలాంటి ప్యాకేజీలను తాము ఒప్పుకునేది లేదని స్పష్టం చేశారు. తమకు తెలంగాణ రాష్ట్రం తప్ప ఏదీ వద్దన్నారు. మండలి అంటే తెలంగాణలో కాంగ్రెసు పార్టీ శాశ్వతంగా ప్రజలకు దూరమవుతుందని హెచ్చరించారు. కొత్త నాటకానికి తెరలేపిన కాంగ్రెసుకు ఉప ఎన్నికల్లో దరావత్తు దక్కకుండా చేసి అభివృద్ధి మండళ్లపై నిరసన వ్యక్తం చేయాలని హరీష్ రావు ప్రజలను కోరారు.

కాంగ్రెసు పార్టీ అధిష్టానం చేస్తున్న ఇలాంటి ప్రతిపాదనల పైన పంచాయతీ రాజ్ శాఖ మంత్రి జానా రెడ్డి స్పందించాలని అన్నారు. తెలంగాణపై వైఖరి తేల్చకుండా రెండు కళ్ల సిద్ధాంతంతో వెళుతున్న తెలుగుదేశం పార్టీని ఓడించాలని ఆయన అన్నారు. తెలంగాణ కోసం రాజీనామా చేసిన త్యాగధనులనే గెలిపించాలని ఆయన సూచించారు. కాగా తెలంగాణకు ప్యాకేజీ, అభివృద్ధి మండలిని ఏర్పాటు చేసే ఆలోచనలో కేంద్రం ఉన్నట్లుగా వార్తలు వచ్చిన విషయం తెలిసిందే.

Published On February 28, 2012