తొలి పెళ్లిని దాచిన టెక్కీ కోసం లుకవుట్ నోటీసు

By Pratap

Published: Tuesday, February 28, 2012, 10:00 [IST]

హైదరాబాద్: తన మొదటి పెళ్లిని దాచి పెట్టి మరో పెళ్లికి సిద్ధపడిన సాఫ్ట్‌వేర్ ఇంజనీర్ టి. ఉమామహేశ్వర రావు కోసం పోలీసులు లుకవుట్ నోటీసు జారీ చేశారు. తమ మొదటి పెళ్లిని దాచేసి మరో అమ్మాయిని పెళ్లి చేసుకోవడానికి అతను సిద్ధపడిన విషయం తెలిసిందే. ఈ విషయం అమ్మాయి కుటుంబ సభ్యులకు తెలియడంతో అతను పరారయ్యాడు. చీటింగ్ కేసు నమోదు చేసిన తర్వాత పోలీసులు మాదన్నపేట పోలీసులు సరూర్‌నగర్‌లోని అలకాపురిలో గల ఉమా మహేశ్వర రావు నివాసంలో సోదాలు నిర్వహించారు.

ఉమామహేశ్వర రావు పాస్‌పోర్టు, ప్లాస్టిక్ కరెన్సీతో పారిపోయినట్లు పోలీసులు అనుమానిస్తున్నారు. ఇంతకు ముందు అతను ఐర్లాండ్, మలేసియాల్లో పనిచేశాడు. అతను ఈ నెల 15వ తేదీన హైదరాబాద్ వచ్చి రెండో పెళ్లికి సిద్ధపడ్డాడు. ఉమామహేశ్వరరావుకు మలేసియా వీసా ఉంది. దీంతో అతను అక్కడికే పారిపోయి ఉంటాడని అనుమానిస్తున్నారు. ఉమా మహేశ్వర రావు తండ్రి యాదగిరి రిటైర్డ్ పోలీసు ఇన్‌స్పెక్టర్. కుమారుడి ప్రవర్తన పట్ల అతను కూడా చాలా బాధపడుతున్నాడు.

Published On February 28, 2012