చిరంజీవి పార్టీకి గుర్తింపా?, బ్రిటిష్ కాలం భాష: టిడిపి

By Srinivas

Published: Wednesday, February 29, 2012, 15:16 [IST]

హైదరాబాద్: కాంగ్రెసు పార్టీలో విలీనమైన తర్వాత కూడా చిరంజీవి ప్రజారాజ్యం పార్టీకి అసెంబ్లీలో ప్రత్యేక గుర్తింపు ఇవ్వడం ఏమిటని తెలుగుదేశం పార్టీ నేత గాలి ముద్దుకృష్ణమ నాయుడు బుధవారం ప్రశ్నించారు. వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వర్గం శాసనసభ్యులపై స్పీకర్ ఇంత వరకు ఎందుకు చర్యలు తీసుకోవడం లేదన్నారు. అలా చేయడం రాజ్యాంగ ఉల్లంఘనే అన్నారు. సభను సజావుగా నడిపించడంలో స్పీకర్ విఫలమయ్యారని విమర్శించారు. వెంటిలెటర్ పైన ఉన్న ప్రభుత్వాన్ని కాపాడేందుకు స్పీకర్ గంటల తరబడి వాయిదా విధానాన్ని అవలంభిస్తున్నారని ఆరోపించారు.

శాసనసభలో మంత్రులు వాడుతున్న భాష బ్రిటిష్ కాలాన్ని గుర్తుకు చేస్తోందని మరో నేత లింగారెడ్డి అన్నారు. అనువాద పదాలు కూడా ఆయుర్వేదంలో ఔషధాల పేర్లను పోలి ఉన్నాయని ఎద్దేవా చేశారు. మంత్రులు ఉపయోగిస్తున్న భాషను మార్చి వాడుక భాషను అందుబాటులోకి తీసుకు రావాల్సిందిగా స్పీకర్‌కు విజ్ఞప్తి చేసినట్లు చెప్పారు. కాగా మంత్రి పార్థసారథి వ్యాఖ్యలపై తెలుగుదేశం పార్టీ ఎమ్మెల్యేలు గవర్నర్ నరసింహన్‌కు లేఖ ద్వారా ఫిర్యాదు చేశారు. అసెంబ్లీ వేదికగా ప్రభుత్వ పథకాలన్నీ కాంగ్రెసు నేతల కోసమేనని మంత్రి చెప్పారని, అధికార దుర్వినియోగానికి పాల్పడుతున్న పార్థసారధిపై చర్యలు తీసుకోవాలని వారు లేఖలో కోరారు.

Published On February 29, 2012