కొవూర్‌లో కెసిఆర్‌కు పోటీ సభ పెడతా: టిజి వెంకటేష్

హైదరాబాద్: తెలంగాణ రాష్ట్ర సమితి అధ్యక్షుడు, మహబూబ్ నగర్ పార్లమెంటు సభ్యుడు కల్వకుంట్ల చంద్రశేఖర రావు శ్రీ పొట్టి శ్రీరాములు నెల్లూరు జిల్లాలోని కొవ్వూరు నియోజకవర్గంలో ఆంధ్ర ప్రజా సమితి పార్టీ తరఫున ప్రచారం చేసేందుకు వస్తే తాను కాంగ్రెసు తరఫున ప్రచారం చేసేందుకు వెళతానని చిన్న నీటి పారుదల శాఖ మంత్రి టిజి వెంకటేష్ బుధవారం చెప్పారు. కెసిఆర్ కొవూరులో ప్రచారం చేస్తే అదే సమయంలో నేను అక్కడ సభను ఏర్పాటు చేస్తానని చెప్పారు. కెసిఆర్ అక్కడ ప్రత్యేక వాదం వినిపిస్తే తాను సమైక్యవాదం వినిపిస్తానని చెప్పారు. ఆయనపై ఎవరూ దాడి చేయకుండా చూస్తానని చెప్పారు. కెసిఆర్ అక్కడ ఏర్పాటు చేసే సభకు ఎక్కువ జనం వస్తే రావొచ్చునని.. అడవి మనుషులను చూసేందుకు కూడా జనం అధికంగా వస్తారని విమర్శించారు.

తమ పార్టీ అధిష్టానం ఆమోదిస్తే తాను తెలంగాణ ప్రాంతంలోని నియోజకవర్గాల్లో ప్రచారం చేసేందుకు కూడా సిద్ధంగా ఉన్నానని చెప్పారు. మహబూబ్ నగర్ జిల్లాలో తాను ప్రచారం చేస్తానని చెబితే మా వాళ్లే వద్దని వారిస్తున్నారని ఆయన చెప్పారు. కాగా కొవ్వూరులో టిఆర్ఎస్ తరఫున అభ్యర్థిని నిలబెడతామని మొదట ప్రకటించిన కెసిఆర్ ఆ తర్వాత ఆంధ్ర ప్రజా సమితి విజ్ఞప్తి మేరకు బరి నుండి తప్పుకుంటున్నామని ఆ పార్టీ అభ్యర్థి ప్రచారం కోసం వెళతానని చెప్పిన విషయం తెలిసిందే.

English summary

Minister TG Venkatesh lashes out at TRS chief K Chandrasekhar Rao today. He announced that he will campaign in Kovur.