ఇదేం డ్రైవింగ్?: యువత జెట్ స్పీడ్‌పై జయసుధ కలత

By Srinivas

Published: Wednesday, February 29, 2012, 9:14 [IST]

హైదరాబాద్: రోడ్డు ప్రమాదాలపై సికింద్రాబాద్ శాసనసభ్యురాలు జయసుధ మంగళవారం ఆవేదన వ్యక్తం చేశారు. యువకులు రోడ్డు ప్రమాదాలకు ఎలా గురవుతున్నారో ఆమె శాసనసభ ఆవరణలో విలేకరులతో చెప్పారు. ఈ విషయాన్ని ఆమె పోలీసుల దృష్టికి కూడా తీసుకు వెళ్లారు. మంగళవారం ఉదయం తాను అసెంబ్లీకి వస్తుండగా ఫిలింనగర్ వద్ద ఓ కారు తన కారు పక్క నుండి అతివేగంగా దూసుకు వెళ్లిందని, ఆ స్పీడ్ చూసి తాను ఇదేం డ్రైవింగ్ ఇంత రాష్‌గానా ఎవరిని చంపడానికెళ్తున్నట్టు అని అనుకుంటుండగానే ఆ వాహనం ఓ స్కూటర్‌ను ఢీకొందని ఆ తర్వాత ఒక చెట్టును ఢీకొందని చెప్పారు. తన కళ్ల ముందే ఆ ప్రమాదం జరిగిందన్నారు. రక్షించేందుకు తాను వెళ్లానని అంతలో అందులో నుండి ఓ పందొమ్మిదేళ్ల యువకుడు బయటకొచ్చాడని అందులో మద్యం బాటిల్స్ కూడా ఉన్నాయని చెప్పారు.

అదే ప్రాంతంలో సోమవారం కూడా ఇలాంటి ప్రమాదమే జరిగిందని స్థానికులు చెప్పారని వివరించారు. యువకులు మద్యం మత్తులో అదుపు తప్పి డ్రైవ్ చేస్తున్నారని, తగిన చర్యలు తీసుకుని ఇలాంటి ప్రమాదాలు జరక్కుండా నివారించాల్సిన అవసరం ఉందని ఆమె అభిప్రాయపడ్డారు. ఈ ఘటనలను పోలీసు ఉన్నతాధికారుల దృష్టికి తీసుకు వెళ్లి నివారణకు తగిన చర్యలు తీసుకోవాలని ఆమె కోరారు.

Published On February 29, 2012