అనుమానంతో భార్యను చంపి భర్త ఆత్మహత్య యత్నం

హైదరాబాద్: అనుమానంతో భార్యను చంపి తాను ఆత్మహత్య చేసుకోవడానికి ప్రయత్నించిన ఓ భర్త దారుణ ఉదంతం చోటు చేసుకుంది. హైదరాబాదులోని ఎల్బీ నగర్‌లో గల ఎన్టీఆర్ నగర్ మూడో దశలో మంగళవారం ఈ సంఘటన చోటు చేసుకుంది. ఓ పాఠశాలలో అటెండెంట్‌గా పనిచేస్తున్న 26 ఏళ్ల జి. లక్ష్మిని అతని భర్త రాజు హత్య చేసి, ఆ తర్వాత లుంగీతో ఉరేసుకుని ఆత్మహత్య చేసుకోవడానికి ప్రయత్నించాడు. వారికి అరుణ్ కుమార్ (8), మౌనిక (6) అనే ఇద్దరు పిల్లలు ఉన్నారు.

వారిద్దరికి తొమ్మిదేళ్ల క్రితం పెళ్లయింది. అరుణ్ తమ మామ శ్రీనివాస్ ఇంటికి వెళ్లి, తండ్రి ఆత్మహత్య చేసుకోవడానికి ప్రయత్నిస్తున్నాడని చెప్పాడు. దీంతో శ్రీనివాస్‌తో పాటు ఇరుగుపొరుగువారు అక్కడికి చేరుకున్నారు. రాజు లుంగీతో ఉరేసుకుని వేళాడుతుండడం కనిపించాడు. లక్ష్మి ప్రాణాలు విడిచి కింద పడిపోయి కనిపించింది. అతన్ని కిందికి దించి ఆస్పత్రికి చేర్చారు. అతను కోమాలోకి వెళ్లిపోయాడు.

రాజు మద్యం మత్తులో ఇంటికి వచ్చాడని, ఆ మత్తులో భార్యపై అనుమానంతో ఈ అఘాయిత్యానికి పాల్పడ్డాడని పోలీసులు చెప్పారు. భార్యకు వేరే వ్యక్తితో అక్రమ సంబంధం ఉందనే అనుమానంతో రాజు ఈ దారుణానికి ఒడిగట్టినట్లు అనుమానిస్తున్నారు.

English summary

A centring worker allegedly throttled his wife to death and later attempted suicide by hanging himself at Phase III, NTR Nagar, at LB Nagar on Tuesday. The man slipped into coma after being admitted to hospital.