చిరంజీవి హీరో, బొత్స విలన్‌గా ఐతే..: చిరువర్గం మంత్రి

By Srinivas

Published: Thursday, March 1, 2012, 9:27 [IST]

హైదరాబాద్: తిరుపతి శాసనసభ్యుడు చిరంజీవి హీరోగా నటించే సినిమాలో ప్రదేశ్ కాంగ్రెసు కమిటీ అధ్యక్షుడు, రవాణా శాఖ మంత్రి బొత్స సత్యనారాయణను విలన్‌గా పెడితే బాగుంటారని చిరంజీవి వర్గం మంత్రి గంటా శ్రీనివాస రావు బుధవారం అసెంబ్లీ లాబీల్లో చలోక్తులు విసిరారు. గంటా శ్రీనివాస రావు బుధవారం జీన్స్ ప్యాంట్ వేసుకొని వచ్చారు. ఆయనను అసెంబ్లీ లాబీల్లో చూసిన విలేకరులు మీరు చిరంజీవితో కలిసి మల్టీస్టారర్ సినిమాలో నటించొచ్చు కదా అని సరదాగా ప్రశ్నించారు. అందుకు గంటా బొత్స పర్సనాలిటీ బాగుంటుందని, మంచి పొడుగు అని విలన్ పాత్రకు బాగుంటారని చెబుతూ చిరంజీవిని హీరోగా పెడితే సరిపోతుందని అని అక్కడ నవ్వులు పూయించారు.

మరోవైపు అనంతపురం జిల్లా సీనియర్ కాంగ్రెసు పార్టీ శాసనసభ్యుడు జెసి దివాకర్ రెడ్డి కూడా శ్రీ పొట్టి శ్రీరాములు నెల్లూరు జిల్లా కొవ్వూరు నియోజకవర్గంలో ఎవరు గెలిచినా నా వాళ్లే అని అందరినీ ఆశ్చర్యపరిచారు. వైయస్సార్ కాంగ్రెసు పార్టీ తరఫున బరిలోకి దిగుతున్న నల్లపురెడ్డి ప్రసన్న కుమార్ రెడ్డి తనకు అల్లుడు అవుతారని, టిడిపి అభ్యర్థి సోమిరెడ్డి చంద్రమోహన్ రెడ్డి తమ్ముడు వరుస అని చెప్పారు. ఇక కాంగ్రెసు అభ్యర్థి శ్రీనివాస్ గెలిస్తే తమ పార్టీ నేత అన్నారు. వీరిలో ఎవరు గెలిచినా తన వాళ్లేనని అన్నారు.

Published On March 1, 2012