తిరుమల సత్రాలలో కాంగ్రెసు నేత కొడుకు రాసలీలలు?

By Srinivas

Published: Thursday, March 1, 2012, 8:59 [IST]

చిత్తూరు: పవిత్ర పుణ్యక్షేత్రం తిరుమలలో బుధవారం రాత్రి ఓ అపచారం వెలుగులోకి వచ్చింది. పవిత్ర పుణ్యస్థలంలో వ్యభిచారానికి పాల్పడుతూ ఇద్దరు నిందితులు పట్టుబడ్డారు. మరో ఇద్దరు మహిళలను సంఘటన ప్రాంతం నుంచి పారిపోవడానికి పోలీసులు సహకరించారనే ఆరోపణలు వినిపిస్తున్నాయి. నిందితుల్లో ఒకరు కాంగ్రెసు పార్టీ నేత కుమారుడు ఉన్నారని తెలుస్తోంది. తిరుమలకు చెందిన సదరు నేత తనయుడు తిరుపతిలోని తిరుమల నగర్‌కు చెందిన మరో వ్యక్తితో కలిసి సప్తగిరి సత్రాల్లోని ఓ కాటేజీలో వ్యభిచారానికి పాల్పడుతున్నట్లు వెలుగులోకి వచ్చింది.

సత్రాల్లో వ్యభిచారానికి పాల్పడుతున్నట్లు కొందరు పోలీసులకు సమాచారం అందించారు. సమాచారం అందుకున్న పోలీసులు వెంటనే అక్కడకు వెళ్లి దాడి చేశారు. ఇద్దరు మహిళలను, ఇద్దరు పురుషులు అక్కడ ఉన్నట్లు గుర్తించారు. పోలీసులు మగవారిని అదుపులోకి తీసుకున్నారు. మహిళలు మాత్రం అక్కడ నుండి వెళ్లిపోయారు. వారిని అదుపులోకి తీసుకొని పోలీసులు విచారిస్తున్నారు. అయితే నిందుతులు రాజకీయ నేత కుమారుడు కావడంతో వారిని తప్పించేందుకు ప్రయత్నాలు జరుగుతున్నాయని అంటున్నారు.

Published On March 1, 2012