జూ. ఎన్టీఆర్‌పై వ్యాఖ్య: చంద్రబాబుతో హరికృష్ణ రాజీ?

By Pratap

Published: Monday, March 5, 2012, 15:22 [IST]

హైదరాబాద్: తన బావ తెలుగుదేశం పార్టీ అధ్యక్షుడు నారా చంద్రబాబున నాయుడిపై కారాలు మిరియాలు నూరుతూ వచ్చిన రాజ్యసభ సభ్యుడు నందమూరి హరికృష్ణ రాజీ పడ్డారనే అనుమానాలు వ్యక్తమవుతున్నాయి. ఇద్దరికి మధ్య పొసగడం లేదంటూ చాలా కాలంగా వార్తలు వస్తున్నాయి. అయితే, తన కుమారుడు జూనియర్ ఎన్టీఆర్ రాజకీయానుభవం గురించి చేసిన వ్యాఖ్యలను బట్టి హరికృష్ణ చంద్రబాబుతో రాజీకి వచ్చినట్లు ప్రచారం జరుగుతోంది. జూనియర్ ఎన్టీఆర్‌కు రాజకీయాల్లో ఇంకా అనుభవం రావాలని ఆయన వ్యాఖ్యానించారు. దీన్నిబట్టి, పార్టీలో వారసత్వపోరు కోసం జూనియర్ ఎన్టీఆర్ చేసిన పోరాటాన్ని తప్పు పడుతున్నారా అనే ప్రశ్న కూడా ఉదయిస్తోంది. నందమూరి, నారా కుటుంబాల మధ్య ఏ విధమైన విభేదాలు లేవని కూడా హరికృష్ణ చెప్పారు.

అవసరమైనప్పుడు పార్టీ కోసం జూనియర్ ఎన్టీఆర్ ముందుకు వస్తారని ఆయన చెప్పారు. అయితే, జూనియర్ ఎన్టీఆర్ పిలువగానే వచ్చి తెలుగుదేశం పార్టీకి ప్రచారం చేస్తారా అనేది అనుమానమేనని అంటున్నారు. సినిమాలపై పూర్తిగా దృష్టి సారించిన జూనియర్ ఎన్టీఆర్ ఇప్పుడు రాజకీయాల గురించి మాట్లాడే స్థితిలో లేరని అంటున్నారు. ఒక రకంగా చంద్రబాబు నాయకత్వాన్ని సమర్థిస్తూ తెలుగుదేశం పార్టీకి ప్రచారం చేసేందుకు కూడా ఆయన సిద్ధంగా లేరని అంటున్నారు.

తన కుమారుడు నారా లోకేష్ విషయంలో చంద్రబాబు వెనక్కి తగ్గడం వల్లనే హరికృష్ణ తన పోరాటాన్ని తాత్కాలికంగా వాయిదా వేసుకున్నట్లు చెబుతున్నారు. జూనియర్ ఎన్టీఆర్ ఇప్పటికిప్పుడు రాజకీయాల్లోకి వచ్చి, చక్రం తిప్పాలనే ఆలోచనలో కూడా లేరని అంటున్నారు. చంద్రబాబు వారసుడిగా నారా లోకేష్ రాకుండా చూసుకోవడమే ఆయన ప్రస్తుతానికి చేసే పని అంటున్నారు. అందుకు అనుగుణంగానే హరికృష్ణ ఒక ఎత్తుగడగా మాత్రమే ఆ ప్రకటన చేశారనే మాట వినిపిస్తోంది.

Published On March 5, 2012