జూ.ఎన్టీఆర్‌కు అనుభవం లేదు, ఫ్యూచర్ ఉంది: హరికృష్ణ

By Srinivas

Published: Monday, March 5, 2012, 14:51 [IST]

రాజమండ్రి: రాజకీయాలపై తన తనయుడు, హీరో జూనియర్ ఎన్టీఆర్‌కు ఇంకా అనుభవం కావాలని తెలుగుదేశం పార్టీ రాజ్యసభ సభ్యుడు, స్వర్గీయ నందమూరి తారక రామారావు తనయుడు నందమూరి హరికృష్ణ సోమవారం తూర్పు గోదావరి జిల్లాలో స్పష్టం చేశారు. ఆయన రాజమండ్రి వచ్చారు. ఈ సందర్భంగా మీడియాతో హరికృష్ణ మాట్లాడారు. రాజకీయాలపై జూనియర్ ఎన్టీఆర్‌కు ఇంకా అనుభవం కావాలని ఆయన అభిప్రాయపడ్డారు. ముందు ముందు తన తనయుడికి మంచి భవిష్యత్తు ఉంటుందని ఆయన చెప్పారు. తెలుగుదేశం పార్టీ అధినేత నారా చంద్రబాబు నాయుడు, నందమూరి కుటుంబాల మధ్య ఎలాంటి విభేదాలు లేవన్నారు. తన తండ్రి స్థాపించిన తెలుగుదేశం పార్టీ అభివృద్ధి కోసం అందరం కలిసి పని చేస్తామని ఆయన చెప్పారు.

కాగా ఆదివారం కృష్ణా జిల్లాలో పర్యటించిన ఆయన, పార్టీకి అవసరమైనప్పుడు హీరో జూనియర్ ఎన్టీఆర్‌ సేవలు తాము వినియోగించుకుంటామని అన్నారు. తాను కాని తన కుమారుడు జూనియర్ ఎన్టీఆర్ కానీ తెలుగుదేశం పార్టీకి దూరం కాలేదన్నారు. తాను క్రియాశీలకంగా ఉన్నానని, జూ.ఎన్టీఆర్ పార్టీకి అవసరమైనప్పుడు వస్తాడని అన్నారు. నారా - నందమూరి కుటుంబాల మధ్య ఎలాంటి విభేదాలు లేవని ఆయన చెప్పారు. గతంలో తన సోదరుడు, హీరో బాలకృష్ణ పైనా వివాదాస్పద వ్యాఖ్యలు వచ్చాయన్నారు. పార్టీ కోసం అందరం కలసి కట్టుగా పని చేస్తామని చెప్పారు. మా కుటుంబంలో మూడో తరానికి చెందిన జూ.ఎన్టీఆర్‌ను కూడా ప్రజలు ఆదరించి అభిమానిస్తున్నారన్నారు.

Published On March 5, 2012