పెళ్లిని తిరస్కరించిందని అమెరికా యువతి దారుణహత్య

By Srinivas

Published: Monday, March 5, 2012, 9:20 [IST]

న్యూఢిల్లీ: తనతో పెళ్లి తిరస్కరించిందని అఫ్ఘాన్ సంతతికి చెందిన అమెరికా యువతిని ఢిల్లీలో దారుణంగా హతమార్చిన అఫ్ఘాన్ జాతీయుడిని ఢిల్లీ పోలీసులు ఆదివారం అరెస్టు చేశారు. అతను దేశం విడిచి వెళ్లడానికి పారిపోతున్న కొద్ది గంటలలోనే పోలీసులు అతనిని ఇందిరాగాంధీ అంతర్జాతీయ విమానాశ్రయంలో అరెస్టు చేశారు. ఢిల్లీ పోలీసులు ఈ కేసును కేవలం పన్నెండు గంటల్లోనే ఛేదించడం విశేషం. పోలీసుల కథనం ప్రకారం... ఇరవై రెండేళ్ల పైమానా వారం కిందట అమెరికా నుంచి ఢిల్లీకి వచ్చి జంగ్ పురా ఎక్స్‌టెన్షన్ లో ఆమె పిన్ని ఇంట్లో ఉంటున్నారు. పైమానాకు ఒమెద్ మిల్ హుస్సేన్ అనే ఆఫ్ఘన్ యువకుడితో నిశ్చితార్థం అయింది. అతడితో పెళ్లి ఆమెకు ఇష్టం లేదు. ఇటీవల ఒమెద్ ఢిల్లీ వచ్చాడు. ఒకరోజు వారితో పాటే ఉండి ఆ తర్వాత జంగ్ పురాలోని ఒక అతిథి గృహంలో ఉంటున్నాడు.

పెళ్లి ఇష్టం లేదని పైమానా అతడికి చెప్పింది. ఒక మత పెద్ద ద్వారా పైమానాకు నచ్చజెప్పేందుకు అతడు ప్రయత్నించాడు. అయితే పైమానా అంగీకరించక పోవడంతో ఆమెకు, ఒమెద్‌కు తరుచూ గొడవలు జరుగుతుండేవి. శనివారం రాత్రి కూడా గొడవ అయింది. అప్పుడు ఒమెద్ ఆమెను కత్తితో పొడిచి హత్య చేసి పరారయ్యాడు. రాత్రి సుమారు గం.11.45 నిమిషాలకు పోలీసులకు ఫిర్యాదు అందింది. వారు వెళ్లి సంఘటన స్థలాన్ని పరిశీలించారు. తర్వాత పైమానా స్నేహితురాలు తెలిపిన సమాచారంతో ఒమెద్ నే నిందితుడిగా భావించి దేశంలోని అన్ని ఇమ్మిగ్రేషన్ తనిఖీ కేంద్రాలను అప్రమత్తం చేశారు. నిందితుడు ఆదివారం విమానాశ్రయం నుండి ఆఫ్ఘనిస్తాన్ పారిపోవడానికి సిద్ధమవుతున్నట్లు తెలుసుకున్న పోలీసులు, అక్కడకు చేరుకొని అతన్ని అరెస్టు చేశారు.

Published On March 5, 2012