గంగా భవానీ, రజినీ రెడ్డి వర్గాల సిగపట్లు, వార్

By Pratap

Published: Thursday, March 8, 2012, 13:10 [IST]

హైదరాబాద్: మహిళా దినోత్సవం సందర్భంగా కాంగ్రెసు పార్టీ కార్యాలయం గాంధీభవన్‌లో ఏర్పాటు చేసిన మహిళా కాంగ్రెసు సమావేశం గురువారం రసాభాసగా మారింది. మహిళా కాంగ్రెసు అధ్యక్షురాలు గంగా భవానీ, మరో నేత రజినీరెడ్డి వర్గాల మధ్య ఘర్షణ చోటు చేసుకుంది. రజినీ రెడ్డి వర్గీయులు గంగా భవానీ వర్గంపై విరుచుకుపడ్డారు. ఇరు వర్గాల మధ్య మాటల యుద్ధం చోటు చేసుకుంది. పరస్పరం కొట్టుకునే దాకా పరిస్థితి వెళ్లింది.

తనను సమావేశానికి ఆహ్వానించకపోవడంపై రజినీ రెడ్డి గంగా భవానీపై మండిపడ్డారు. కొత్తగా వచ్చినవారికి ప్రాధాన్యం ఇస్తూ గంగా భవానీ కావాలనే తనను పక్కన పెడుతున్నారని ఆమె విమర్శించారు. ప్రజారాజ్యం పార్టీ నుంచి వచ్చి రేఖ అనే మహిళకు సమావేశ నిర్వహణ బాధ్యతలు అప్పగించడంపై కూడా రజినీ రెడ్డి వర్గీయులు మండిపడ్డారు. గాంధీభవన్‌లో నాయకులు ఇరు వర్గాలను సముదాయించే ప్రయత్నాలు చేశారు. సమాచారాన్ని పిసిసి అధ్యక్షుడు బొత్స సత్యనారాయణకు కూడా చేరవేశారు.

Published On March 8, 2012